【頭條獨家】花姐湊仔苦與樂（四）之 跟姜濤AL AK講對唔住

花姐（黃慧君）同《頭條》講湊MIRROR和ERROR苦與樂去到最終回，花姐大爆湊一班囝囝遇到最大困難外，提到要同姜濤、AL（盧瀚霆）同AK（江𤒹生）講對唔住時，更忍唔住講到眼濕濕。另外，花姐又提到對MIRROR和ERROR未來期望；又爆帶過幾個囝囝去睇塔羅師預測未來；仲有花姐跟16個囝囝想話的心底話，真係有好多感動位㗎！撰文：杜淑霞 攝影：譚壹致

花姐覺得做經理人以來，面對最大困難？

花姐說：「每個artist都有迷茫期，MIRROR迷茫期特別頻密，可能得到嘅嘢好易，好快大家好鍾意佢哋，好快成績好好，會令佢哋突然間迷失，佢哋又未去到囂張，但係好自我，係令到我好困擾，當我同啲同事一發現，就會掹返佢哋返嚟話畀佢哋聽，從頭分析件事，佢哋就會返番初心度再努力，呢件事不停困擾緊我，因不同成員都會發生，但冇話佢哋唔啱，呢樣好嘢正常。（怕外界影響咗佢個判斷？）係，暫時係冇發生過，好驚某啲嘢影響到某啲成員或者成隊MIRROR變成咁，MIRROR嘅可愛係最初嘅努力，變成咁佢哋已經冇價值。好彩佢哋16個係班好善良嘅人，嗌完交後會體諒大家，佢哋亦好願意重新了解呢件事，令我哋繼續行落去。」

花姐最想對那一個成員講對唔住？

花姐說：「我對姜濤同埋Anson Lo（盧瀚霆）特別嚴格，因為佢哋好容易玩『創』個心，唱開隻歌會輕視咗，同埋姜濤大家對佢要求好高，更加捉住佢每樣嘢，Anson Lo跳舞叻，但唱歌唔係好好，要捉緊佢。我對佢兩個嚴格會令佢哋難受，佢哋會話『佢做得我唔做得嘅』，但我係好想佢哋好！知道有令佢哋唔好受，要同佢哋say sorry，原諒我個人係咁粗魯，講嘢大聲。」

花姐說：「另一個對唔住一定係AK（江𤒹生），我有同佢講過好想見到佢攞叱咤新人獎（眼濕濕），不過呢個世界唔係想要就一定有，宣佈咗第三名係阿Lo時，就知佢冇啦！我衝咗去後面喊，見到電視機佢個樣，佢唔開心咗一晚，真係好對唔住，係咪我可以做好啲！？再用力啲推佢隻歌就可以完成呢個夢呢！？新人獎真係一世人攞一次！係咪我plan咗3個出嚟自己人打自己人呢！？我都唔開心咗好耐，反覆喺度諗，呢件事哽喺我心入面好耐。嗰晚好多人走埋嚟恭喜我，其實我笑唔出，我對姜濤都唔公平，姜濤走埋嚟我戥唔到佢開心，某程度我對阿Lo唔住，特登約咗阿Lo完騷後去個朋友度聚，仲預備咗千字文send畀阿Lo，我諗住佢攞唔到會唔開心。人生幾矛盾，最終AK唔開心，阿Lo都有同我去個朋友度，唔係我安慰阿Lo，係佢哋安慰我喺度爆喊。雖然呢一關對我同AK好難過，呢一關令到我哋大個咗，如果再有人攻擊AK我會出聲，唔好用佢嘅真性情攻擊佢，佢嘅努力係值得擁有。」

花姐對MIRROR及ERROR仲有何期望？

花姐說：「MIRROR好希望唔再係大家淨係睇佢哋係一個團體，好希望MIRROR係12個個體，所以點解係『all in one one ＆
all』因為佢哋12個好好睇，最想佢哋每一個都有呢行生存價值，搵到自己獨立生存方法好緊要，亦都可以幫佢哋有自信心，令到佢哋MIRROR有更多光芒。ERROR出嘅歌少啲，但係佢哋創作能力好高，佢哋以前不停咁樣做綜藝，間唔中出歌，我希望佢哋有自己特色嘅歌，佢哋好鍾意啲歌反映社會，好希望佢哋繼續做，佢哋嘅嘢好貼地好中，係可以幫到香港人，同埋好希望保錡快啲出番嚟。」

花姐手上戴了幾條水晶鍊，究竟她做經理人後有冇搵人指點過迷津？

花姐說：「我以前後生有信水晶，有去睇吓相，後尾就冇。我做經理人後突然有日戴水晶，對自己冇晒信心，𠵱家戴就係求安心。不過有次好無聊同咗某啲成員去睇塔羅牌，佢同我哋講2022年會好，好開心，total應該有8個成員睇，但淨係批Edan（呂爵安）2021年會好，後尾Edan出歌我先醒起，真係2021年喎！希望個師傅講嘅嘢係啱，我又唔會信晒，佢話我哋2022年好就唔努力，但會有個動力唔好放棄啦！（師傅有冇講你適唔適合做經理人？）我其實成日都嗌辭職㗎！做經理人唔適合我，魯生（魯庭暉）同金生（金廣誠）都覺得我煩。我有問佢應唔應該辭職，佢就同我講份工令我有好大名利，不過你唔享受，你追求緊另一樣嘢，跟住我話我應唔應辭職，佢係唔贊成，佢話我老細係唔會畀我咁做。我唔要咩名利，16個仔有人識就得，我靜靜喺幕後做嘢可能幫到佢哋更多。」

花姐跟MIRROR及ERROR 16個囝囝有何心底話想講呢？

Lokman（楊樂文）＠MIRROR
花姐說：「Lokman加油！我相信你喺電影方面有好成績，我哋差啲啲機會啫，我哋好快畀人睇到你嘅演技。」

Anson Kong（江𤒹生）＠MIRROR
花姐說：「如果你再發脾氣黑面就五嚿水，今次冇得講價！」

Anson Lo（盧瀚霆）＠MIRROR
花姐說：「我同佢講啲嘢好肉麻，搞唔掂，Love you！」

Ian（陳卓賢）＠MIRROR
花姐說：「大個仔啦，生性啦，對女朋友好啲呀！」

姜濤＠MIRROR
花姐說：「姜濤你唔可以再唔聽話，你唔可以再同我嗌交吓，同我拗呢樣得呢樣唔得咁樣，我哋要和平解決件事，OK！」

Jeremy（李駿傑）＠MIRROR
花姐說：「我覺得你要相信吓自己，你𠵱家未得到你想要嘅嘢，但係唔代表你𠵱家未得到係唔好嘅事嚟，我覺得天會安排到，當適合時候機會就會畀你，所以唔使咁心急。」

Alton（王智德）＠MIRROR
花姐說：「你其實好正，同你傾偈係好開心，你講嘢充滿綜藝感，你唔應該再固執喺以前嘅夢想度，你最緊要做好綜藝，我相信你喺綜藝嗰度你會有好好嘅成績。」

Tiger（邱傲然）＠MIRROR
花姐說：「我愛你！」

Edan（呂爵安）＠MIRROR
花姐說：「真係請食飯呀！你隻MV過咗兩million，你都未請食飯，快啲呀！」

Stanley（邱士縉）＠MIRROR
花姐說：「我成日同Stanley講你唔需要MIRROR，你有條好清楚自己嘅路，你要喺戲劇發展，就算你唔係MIRROR入面最獨當一面，大家最睇到你，其實魯生（魯庭暉）金生（金廣誠）同我都睇到你喺戲劇方面好努力，你未來日子會有好多機會，加油！」

Frankie（陳瑞輝）＠MIRROR
花姐說：「我覺得Frankie太被動，你要再主動啲，我知道你可以做到好多嘢，但係你唔主動會令到人哋睇唔到你，因為機會唔會有好多，你要把握每個機會就要行出嚟畀人睇到你，唔好吓吓都讓個機會畀人。」

阿Jer（柳應廷）＠MIRROR
花姐說：「我講過秘密畀你聽，我哋成個AM team會將MIRROR排1至12位，突然你近排喺我心入面排咗第一位，唔好講畀人聽。」

肥仔（梁業）＠ERROR
花姐說：「肥仔我想話其實ERROR係好多謝你，一路都好包容我，我擺咗好少時間喺ERROR度，全靠你管住佢哋幾個人先可以咁受大家歡迎，所以你要繼續努力，幫我繼續照顧佢哋幾個。」

阿Dee（何啟華）＠ERROR
花姐說：「其實阿Dee都係其中一個要講對唔住，阿Dee喺演戲方面應該要更多機會，我冇做到一個好好嘅經理人幫佢搵到好多演戲機會，所以我亦都要同阿Dee講對唔住，但係我覺得呢個係運氣問題，一個人唔會完全一世都冇運氣，我覺得總有一日大家會睇到你。」

193（郭嘉駿）＠ERROR
花姐說：「雖然大家覺得你係一個唔需要有實力都受歡迎嘅人，因為大家都覺得你係個冇實力但係有gimmick嘅人，我覺得咁樣唔夠令人繼續鍾意，你要無論喺跳舞唱歌同埋做戲進步，我近排見到你喺ig post咗你學唱歌，我都好安慰，肯努力，我唔希望再見到《全民造星》嘅你。」

保錡（吳保錡）＠ERROR
花姐說：「我好欣賞你做音樂嘅堅持，加油呀！我希望有一日我可以將你嘅音樂帶畀更多人聽。」