【獨家】花姐湊仔苦與樂（三）之 為姜濤開心又擔心

花姐（黃慧君）繼續同《頭條》講湊MIRROR和ERROR苦與樂，睇完2018年時花姐對一班囝囝的期望，是時候講返現在「湊仔」感受。花姐由監製轉型兼任經理人已經兩年半，雖然愈來愈大壓力，但原來亦有所得着。花姐對一班囝囝有幾用心有目共睹，她心中目究竟邊個仔最令她開心、放心、窩心、擔心及傷心呢？當中姜濤竟然令她最開心亦最擔心！撰文：杜淑霞 攝影：譚壹致

花姐做了MIRROR和ERROR經理人一段日子，究竟她會如何用一句說話來形容感受？

花姐說：「雖然好行，但真係好似過山車！我由細到大條路都好穩陣，19歲入行，慢慢上，每到一個位就有個高人話畀我聽要點樣行，估唔到45、6歲突然由comfort zone去到另一個位做嘢，一開始好沮喪，但見到佢哋成長、得到認同、fans支持、得好多獎、啲客見親佢哋都好開心，係令我開心，但起跌實在太大。Anson Lo（盧瀚霆）同我講『你可唔可以唞吓！你咁樣真係會黐線！』我一瞓醒就係run MIRROR同ERROR嘅嘢，過程係好開心，畀我再揀都會揀呢條路。原來做經理人咁艱辛，我以前對啲經理人會反佢哋白眼，覺得佢哋好麻煩，我要同佢哋道歉，知佢哋點解咁麻煩。（好大壓力？）係，每樣detail要做得好，因會影響佢哋。（考你EQ？）我EQ低好容易發脾氣，但做經理人後，佢哋唔覺意教識我，好多嘢要從唔同角度去睇，令到我改變，𠵱家最少唔會亂發脾氣，呢個對自己最大得着。」

花姐覺得最令她開心的成員及事件？

花姐說：「姜濤攞咗『我最喜愛男歌手』同埋『我最喜愛歌曲』，我開心唔係因為佢攞兩個獎，係跟住佢上台唱《蒙着嘴說愛你》冇事，跟住大家覺得佢唱《蒙着嘴》都唱得幾好喎！」

花姐覺得最令她放心的成員及事件？

花姐說：「阿Jer（柳應廷）從我決定畀佢單飛，我係好擔心，我記得畀佢入MIRROR時，嗰陣有班委員揀咩成員入呢個男團，阿Jer有少少反對聲音，阿Jer亦唔想入男團，阿Jer繼續喺呢個男團冇單飛嘅話會好坎坷，阿Jer根本就唔適合男團，我搵佢係因為覺得佢把聲好好聽，佢應該入行，又可以幫到當時MIRROR，MIRROR唔係好多人唱到歌。仲記得上次開演唱會，排練時老細坐我隔籬，我同老細講『我哋簽個男團OK，你望唔望到嗰個阿Jer，畀多啲投資我，你信我3年後佢會係陳奕迅』好得戚！諗起心都寒埋。到𠵱家我說服到魯生（高層魯庭暉），佢係認同佢嘅實力，認同我哋簽呢個artist係冇錯。」

花姐覺得最令她窩心的成員及事件？

花姐說：「窩心好多，我哋其實好有愛，佢哋做嘢有少少唔認真就會激嬲我，我就會黑面全日唔講嘢，佢哋𠱁我方法就係全部人一齊唱生日歌，我忍唔住笑佢哋戅居，跟住我哋當無事發生，呢個係組裏面傳統。有次唔係佢哋激嬲我，我私事唔開心，突然佢哋逐個逐個走埋嚟唱生日歌，佢哋12個一齊做呢件事係好暖嘅，好慶幸我去到人生中段可以遇到呢12個男仔，多咗12個仔。（ERROR好少激嬲你？）佢哋少，好記得佢哋有次安慰我，拍《ERROR遊2》我同MIRROR做啲嘢先飛，點知MIRROR激嬲我，我好唔開心跟住第二日飛，去到拍第一個遊戲就係你哋成日睇，我畀佢哋彈落水，落到水我受傷呼吸唔到，撻落水痛到喊，嗰個喊唔純粹係痛，係覺得點解要咁委屈，做經理人啫！阿Dee（何啟華）就走埋嚟攬住我，呢個shot都有出街，佢哋都知我唔開心，攬住我喊發洩完就冇事。ERROR唔使湊，係ERROR湊我㗎！肥仔（梁業）又會冇咩事打個電話嚟，『花姐有冇咩事，有嘢就搵我啦』呢啲都好窩心。」

花姐覺得最令她擔心的成員及事件？

花姐說：「第一個擔心係姜濤，佢𠵱家萬千寵愛，之後個人變成點，好影響以後嘅路，總之做嘅嘢啱晒，佢𠵱家唔係咁，但好容易變成咁，好彩佢以前係肥仔，同埋佢媽咪管教得佢好好，男仔廿幾歲都咁純。我會經常提醒佢，你要謙虛，唔代表你得到嘢唔需要努力。（舊年攞咗咁多獎，你會唔會心理輔導佢，下年呢啲獎未必再係佢攞？）佢最想要嘅唔係獎，最想我畀自由度佢做自己鍾意嘅音樂，畀好大投資佢拍鍾意嘅MV。佢鍾意嘅唔係好主流嘅音樂，佢會覺得『你都聽我鍾意嘅音樂，多過你畀個獎我』，姜濤同我有同一個理念，佢好想用佢嘅影響力去帶多啲唔同種類嘅歌畀大家。」

花姐說：「我擔心Anson Kong（江𤒹生）好矛盾，我鍾意佢嘅直接，唔鍾意就話你聽唔鍾意，好開心就會癲咗咁開心，好鍾意佢呢種真，但又令我有啲擔心。（叱咤頒獎禮有好多聲音？）係有好多聲音話佢『妒忌人哋』，我見到佢個樣我都好擔心，大家誤會佢，我仲聽到有啲人話『你成日利用所謂嘅真，做乜都得咁樣』但係唔係一啲咁真嘅人先至珍惜咩！？我都好珍惜，但好驚好多人誤會佢，令好多人傷害佢，我想喊𠻹！我知呢個仔有脆弱一面，佢係12個MIRROR裏面最勤力嗰個，佢有空檔就彈結他學唱歌，佢話『我唔拍拖啦！呢幾年去做我最想做嘅嘢』，佢應該可以得到更多，但可能性格令好多人批評佢，令佢失去好多嘢，好心痛佢。」

花姐覺得最令她傷心的成員及事件？

花姐說：「佢哋有時誤會咗我，『花姐你偏心，冇畀呢個機會我』佢哋迷茫時就成日會做呢啲，我當然會傷心，我知道我唔係，雖然我唔可以畀16個人嘅愛一樣，我一定係愛呢16個人，求其一個叫我死都可能去。疫情佢哋冇工開，會覺得係咪花姐幫我唔到，我聽到呢啲說話係好傷心，因為自己已經200%幫緊佢哋，佢講都唔係想傷害我，只係衝口而出，我哋熟到好似屋企人一樣，有時都會講啲說話傷害到大家。不過我哋好快就冇事，因為有睇到我努力，我都有話畀佢聽希望點樣幫到佢。」