【獨家】被鄧建明用粗口鬧到大 「和音王」鍾達茵出碟唐奕聰讚好
2020-12-20 23:15 
「和音王」鍾達茵（Pam）曾為陳奕迅、容祖兒、薛凱琪等作曲填詞，亦係太極樂隊演唱會音樂班底。2011年創作的作品《明明愛你》賣到台灣由當地歌手林凡演唱，紅極一時，最近她改成廣東話版翻唱，獲「爸爸」唐奕聰(Gary)及「師兄」鄧建明(Joey)力撐，Pam好感動並大爆畀Joey爆粗由細鬧到大才令她成材！採訪：方騫平 場地：THE STADIUM@觀塘
去年鍾達茵自資推出限量版卡式帶連卡式機套裝大碟《One Time Only》，收錄咗《明明愛你》、《活在記念中》、《傻瓜》等歌，堅持畀錢出歌，因為Pam視 Joey哥係人辦，由幕後走出幕前一樣咁受歡迎，更恨有朝一日成為太極樂隊表演嘉賓。
愈鬧愈進步
三年前Pam翻唱《明明愛你》時，Joey主動提出要幫她手，還揹住枝私伙木結他入錄音室錄製結他部份，令她十分感動：「唔好以為Joey哥成日嬉皮笑臉，其實對音樂好嚴謹，我有個名叫『移動靶』，畀佢粗口X大，尤其是做太極紅館演唱會音樂編程員先鬧得甘，不過我又抵鬧嘅，當時經驗又少，慢手慢腳，切合唔到佢哋時間要求，同埋佢會成日打嚟話我唱得點唔好，反而Gary哥錫住我唔會鬧。」Joey Tang大笑說：「佢特登做錯嘢畀人鬧令人開心吓啫，不過佢進步得好快，𠵱家我哋冇得唔用佢喇！」Gary Tong就大讚Pam喺Joey鞭策下唱得好好，而且新版比十年多前摩登。
問到太極可會收徒？Gary Tong說：「哈！當年我只係搵賺錢工具，點知佢哋青出於藍，搵錢仲多過我。我當Pam係囡囡，Joey就係徒弟，所以Pam同Joey係師兄妹關係，正確嚟講呢兩個係我音樂知己，都能夠獨當一面。」
最新回應