【百萬續約費】新城同五大唱片公司斷交 明年冇得播Eason Jason歌

喺經濟不景下，新城電台除日前大裁員，在職全職DJ由全職變兼職，仲要做埋Sale養自己外，因為版權費問題新城與香港音像聯盟（HKRIA）合約將於12月31日屆滿，明年不能播放及使用HKRIA旗下唱片公司，包括環球唱片、華納唱片及Sony Music等的歌曲和音樂。新城只可按照國際唱片業協會（香港區）（IFPI）的會員名單，包括旗下英皇娛樂、星夢、寰亞唱片、太陽娛樂等歌。據知，日前高層已作出內部指示，明年開始不能播五大唱片公司的歌，缺裂無法修補，狀況跟TVB和五大唱片公司一樣。不過五大唱片公司環球唱片、華納唱片及Sony Music好頭好尾，依然會派歌手出席30日的《勁爆頒獎禮》，但日後就不會再到新城電台派歌，明年新城頒獎禮跟TVB《勁歌》處境一樣。

其實IFPI及香港音像聯盟（HKRIA）每年會幫旗下屬會向播歌公司或機構收取版權費，以往一年續約費約6數字，有傳HKRIA開出令電台不勝負荷的「百萬續約費」，由於HKRIA屬會全部係國際公司，版權費不二價，部份條款細則亦未能達共識，雙方拉鋸不成，被迫暫時唔合作。

明年起新城不能播五大唱片中文歌外，歌曲選擇少咗外，連播英文歌都有選擇困難，因為大部份版權屬HKRIA持有。「五大唱片」旗下歌手眾多，包括有陳奕迅、張學友、梁詠琪、AGA、Gin Lee、許廷鏗、林欣彤、衛蘭、陳柏宇等。

另外，據知，新城喺疫市下為咗增加收入，寧可將節目時段買畀贊助商及唱片公司，包括施匡翹開咪嘅節目《猜情尋》、歐信希主持嘅《傾心相聚》及由環球贊助，剛播完的《共享音樂空間之三九吾識嗡》，所以只好cut咗張瑪莉節目《百分百張瑪莉》。