【獨家】行超市買好多廁紙 Joey Tang揀完紅酒老婆唔畀買

2020-11-24 20:27

呢期鄧建明(Joey)出鏡率好高，一星期見足五日，因為佢同郭偉亮（Eric Kwok）及卓韻芝齊擔任ViuTV選秀真人騷《全民造星III》評判，下個月又要幫太極隊友雷有輝音樂會做bandleader，雖然好忙，但仍然有時間陪老婆行超市，仲出力拎廁紙，好幫得手。
採訪:譚壹致

因為做《全民造星III》評判先知道Joey份人原來都幾好，見到啲騎喱參賽者，或者睇到好恐怖嘅表演都唔會好毒舌，又唔會直率地叫人「唔好啦」，最多叫佢哋努力啲或者未合符標準，仲會鼓勵有歌藝冇樣嘅參賽者去做和音，一樣可以闖出一片天，聽嘅舒服，幾好吖。

好聽老婆話
日前夜晚7點半，着住超人tee加短褲嘅Joey同老婆去咗又一城行超市，一家之主負責推住手推車，兩公婆先去買廁紙，前後三卷，再加購兩條盒裝紙巾，全部同牌子，個仔去咗澳洲讀書，呢堆嘢兩公婆應該有排用。行行下兩公婆分開咗，Joey企喺紅酒櫃前係咁睇，睇睇吓啱水心就放兩支去購物車，之後老婆會合返佢見到架車有酒即刻放返喺架，咦，Joey係咪平時飲太多呀?