【獨家】雷有輝8月Show如期開 鄧建明出心出力幫到底

太極樂隊主音雷有輝（Patrick）喺樂壇超過40年，幫過好多紅星如葉德嫻及黎明等做和音，跟過已故梅艷芳及陳百強等走埠登台，更加係張國榮御用和音，資歷豐富但從來未開過個唱，好兄弟鄧建明(Joey)即出手穿針引線成好事。Patrick將於8月15至16日於西九龍戲曲中心舉行個人音樂會《PAT Music Over Rainbow》。對於第三波疫情爆發，問Patrick會否取消音樂會，他稱未收到通知，而Joey亦坦言未有Plan B，表示主辦商唔會咁易放棄。採訪：方騫平 場地：海港城台北.寛巷子

Joey好幫手，唔止介紹老細幫Patrick開show，仲出心出力，由音樂總監、幕後策劃、「結他妹仔」一手包辦，Joey說：「佢把聲係行內和音界冠軍，點解唔開一個solo演唱會呢？我唔使去鼓勵佢，大家有耳聽嘛。基本上喺嗰個場地，一把靚聲一枝結他，唱一系列大家熟識嘅歌就ok，唔使要好多嘉賓。」

Joey仲派定心丸畀Patrick：「放我喺度有招財貓效應，舊年11月我都喺社運期間順利開到演唱會，所以佢唔使擔心8月個show。03年港台為踢走沙士叫我哋唱《We Shall Overcome》，唱完疫症即消除，所以我特哋喺ViuTV節目《Chill Club》度為佢再唱多次。」Patrick獲鼓勵下信心滿滿：「好多朋友兄弟撐我，壓力都消除咗，冇猶疑到底開唔開，而且8月係靚期。𠵱家我好fit，總之大家要洗多啲手，保持衛生。」

問到可會請埋太極兄弟撐場？Patrick笑說：「太極兄弟嬲豬，唔畀我唱佢哋啲歌，話我飛起咗佢哋喎，其實係調返轉。」Joey又為他諗埋計：「咁改編首《留住我吧》，咪唔關佢哋事囉，佢哋冇聲出！哈！」