【獨家】返新城開咪唔驚得咁多 范振鋒嘆要搵食冇辦法
2020-08-09 22:18 
新冠肺炎嚴峻，新城電台由歌手施匡翹開始到知訊台執行總監程凱欣出現8人感染群組，在新城開咪的薛家燕（家燕姐）為安全計亦自我隔離14日，更因此缺席TVB音樂節目《流行經典50年》兩集錄影。上月13日，曾跟7月22日確診的程凱欣一齊錄音做節目《豐味旅程》的范振鋒坦言：「我冇本事，要出街搵食，唔驚得咁多！」採訪：方騫平
新城爆發感染群組前，范振鋒一周至少留喺公司三日，除咗周六同家燕姐及思敏主持《開心大派對》外，仲要為兩個節目《三九吾識噏》及《豐味旅程》錄音，後者更要同程凱欣拍住上。當電台大消毒解封後，范振鋒即重返新城開工，完全冇諗過改做Phone-in。當然防疫用品如搓手液、消毒噴霧及口罩是必備外，仲加碼戴埋勞工手套，手上的黑色佛珠就更加顯眼。
出街都驚
范振鋒否認驚到要戴護身符：「只係普通佛珠，由細戴到大，用嚟保平安啫。」問到返有多個確診個案嘅新城開工驚唔驚?他坦言返工驚，出街都驚，「中咗好大件事，個人會散晒，入咗個肺就更加麻煩，最好唔出街在家工作，但搵食冇辦法，我都想日日留喺屋企唔使做，但要搵食，冇本事有乜計！做好自己責任，小心啲，我都會落街食嘢同買餸。不過以前一周返兩至三日電台錄三個節目，𠵱家最好一日內搞掂，唔得就在家工作。」
阿范強調曾做過四次檢測，全部都係陰性，所以相當安心，他又指程凱欣已出院：「但就唔知幾時復工，不過我哋節目仲有存貨，所以冇乜問題。」
最新回應