【DJ兼埋Sale】新城今日派「大信封」  薛家燕穩做台柱啤梨焗轉兼職

2020年快將過去，疫情下令全球陷於困局，經濟大受打擊。喺月底(30日)舉行新城《勁爆》頒獎禮前夕，新城電台今日提早派「大信封」裁員，除部份員工受影響外，全職DJ都要改變合作方式，重新簽約，以部頭形式合作，不論薪酬及員工福利都能減磅，而且DJ仲要做埋Sale搵客撐自己節目，大原則係有客贊助先會有節目做，冇節目做就冇錢收，連新城DJ代表啤梨（葉文輝）也不能幸免，林子謙就冇得留低。不過，外傳台柱薛家燕（家燕姐）亦成為今次開刀對象，家燕姐大女石祐珊（珊珊）深夜喺Facebook專頁出post否認，強調媽咪本周六會繼續如常開咪主持《開心大派對》。



珊珊代母澄清誤傳
珊珊急澄清說：「這兩天都忙著拍攝，今天我收到記者電話時未能清楚詳細回應，引起了一些誤會，也希望特此澄清：其實家燕姐在新城電台工作超過20年，衆所周知一直對公司及所有同事就像一個大家庭一樣，由主持節目、到邀請嘉賓、甚至跟客戶合作都會親力親為，從來不會忽視電台的工作！對於今日收到有些同事被栽員的消息，我們也同樣感到難過，但也明白這個經濟不景的氣氛下，公司也有他的難處，雖然我們未有受影響，但我們會跟公司一起共度時艱，更加努力做好節目，週六會如常主持《開心大派對》，所以也希望大家繼續多多支持，讓我們在這時間繼續為大家帶來正能量！一起加油。」

啤梨冇怪新城無良
而正值放大假陪老婆慶生嘅啤梨未有打算今日返公司攞信，他承認同公司經已協議好改變方式合作，又同頭條記者表示：「多謝關心，暫時可以唔使擔心，𠵱家新城唔止係員工同僱主關係，仲係我公司同新城嘅合作夥伴，雖然合作形式唔同咗，可以講收入冇咁穩定，但有可能會搵多啲！其實我自己一早都想咁樣合作。」啤梨沒有怪新城係無良僱主，反而幫手講好說話：「傳播媒體都係咁講，媒體經營冇以前咁容易，呢個年代，都係靠自己雙手比較長遠。」

阿范兼職工作不變
至於由新城出身，輾轉喺新城任職27年嘅范振鋒就強調，今次新城裁員行動不受影響，他表示早已轉為兼職DJ，DJ並非他主要收入來源，除咗為興趣，以兼職嚟講，每個月他做4個電台節目，兩個網上節目，收入有5位數字都叫唔錯。他接受頭條訪問時說：「𠵱家電台採取多勞多得玩法，提供一個平台畀我哋發揮，call到客就有得拆，大家雙贏，我哋可以搵多啲，否則唔會開節目，因為我冇減到節目，收入冇大影響，只係壓力大咗，因為要落手落腳湊客。」