【獨家】曾迷信擺陣挽留舊愛　32C余逸思歷人生低潮睇化晒

從ViuTV選美真人騷《美選D.n.A》出身的27歲余逸思（Yoshi），近年憑32C火辣身材及傻大姐性格彈出，估唔到私下是一個「神婆」，精通風水、八字、奇門遁甲之餘，拍畢《旅巫》後仲學埋靈擺、音樂治療等，最近更為ViuTV節目《晚吹－就係唔科學》任主持，大談New age、身心靈、神秘學等。Yoshi忽然研究靈性呢一瓣，原來跟失戀有關，仲因而令她「諗嘢化咗好多」！撰文：黎寶倫　攝影：譚壹致　場地：南瀛水產　鳴謝：Barry@巧鬆啲

昔日戀愛大過天的余逸思，坦承以往非常執着和依賴，情緒很容易受另一半牽動，但過去兩年，經歷政治、疫情、甩拖與親人離世後，開始接觸音樂冥想、靈性動物神諭卡等，令她茅塞頓開，「無論遇到咩困難，好同唔好都係幫助我哋成長，係一個課題。我以前都怕死，而家覺得最緊要享受當下，因為社會氣氛太緊張，好多人擔心將來，又覺得點解返唔到去以前，但其實唔需要返以前，每一刻都可以做一個創新嘅自己。」並謂已學識自私點，多顧自己的感受，「有啲嘢自己唔鍾意就會表達、Say no，我嘅宗旨係做一件事千祈唔好傷害人哋，亦唔好委屈自己。」

愛一個上一課
談到去年失戀，曾找師傅在家擺風水陣，希望舊愛覆自己Message，問現在還會窺探未來嗎？Yoshi說：「接觸靈性方面後，覺得有時未必需要知得太多，宇宙所有嘢都安排好，知都冇意思，仲好影響思維，所以唔會睇，同呢個人開心咪一齊囉，就算佢Hurt你，都同你上咗堂。（渴望新戀情？）順其自然啦，我內心都未Ready。」