【獨家】驚與Ian傳緋聞惹負評　余潔滢最想同林嘉欣鬥戲

余潔滢（Zoe）於ViuTV劇集《男排女將》飾演顧定軒胞妹「安安」兼排球隊助教，與MIRROR成員陳卓賢（Ian）不乏感情戲，雖然Ian力保熒幕初吻，但仍被Zoe錫面，又於對方面前晒肌，令粉絲極之「葡萄」，Zoe也笑言驚大家呷醋：「如果錫咀或更Close我仲驚，So far冇收過粉絲投訴，佢哋知係演戲都理解，但我中學同學鍾意Ian，佢成日Send喊樣嚟話羨慕。」又謂不想傳緋聞，使人誤會她工作不認真，只盼有機會拍不同劇種和電影，讓觀眾看到自己的另一面。撰文：黎寶倫　攝影：李維隆　服裝：HUF @popcorngeneralstore　場地：kolworkshop　 鳴謝：Barry@巧鬆啲

面對大班男對手，余潔瀅坦言好怕醜，起初唔敢開口跟他們傾偈，幸獲「阿哥」照顧才融入大家，「顧定軒好好，會叫我一齊食飯又幫我攞飯，因為佢知我哋好多對手戲，所以同我好快熟絡，等我唔使驚。」提到肥仔和Alton常調戲鄧麗欣，問到可有被撩？她笑道：「冇喎，可能我男仔頭啩。」又直認與角色一樣「麻甩」，除了冬天可以3日唔洗頭外，她亦鍾意打機和睇動漫，私下仲會爆粗。

三點不露
愛上拍劇的Zoe表示恨拍古裝，皆因想體驗不同的造型，亦希望踏足電影界，最想跟林嘉欣合作，「佢好有氣質、笑得好甜，女神一樣，做戲又好好。（醜化演《怪物》都得？）OK，我做戲冇乜包袱，咩類型嘅戲都有興趣，但做唔做到就要落啲苦功。」提到胞姊余香凝於電影《七人樂隊》上演肉搏戲，問是否接受性感演出？她說：「最主要睇劇本，有需要嘅話頂盡露背，三點不露。」經常被指兩姊妹撞樣的Zoe，又稱不介意兩者被拿來作比較，自己也視對方為努力目標，更希望有日超越家姐。