【獨家】疫下接兩戲　新片剷平頭裝演江湖猛人　任賢齊鐵漢柔情陪妻行街孭手袋

第四波疫情再挫電影圈，業內不少人工作都大受影響，但54歲任賢齊（小齊）好好彩，於逆市下連接兩部電影，繼上月中拍竣新片《大Project》後，旋即再為馮志強執導的《失衡兇間：唐樓》開工。由於今次飾演一名出獄的江湖猛人，開拍前他也特意剷了平頭裝，加上留了一面鬚根，望落Man爆兼殺氣十足，不過，私下的小齊其實是一名「暖男」。日前趁放假，《頭條日報》記者就撞到小齊拖實老婆陳則妤（Tina）去淺水灣買救生衣，其間他仲唔介意幫對方孭住個Chanel手袋，又扶實愛妻出出入入，認真Sweet到漏！採訪：張詠森

任賢齊與太太陳則妤從大學時代開始拍拖，至2002年才拉埋天窗，育有15歲大女Rati和12歲細仔Cody。入行30年與緋聞絕緣的他出名是「愛妻號」，即使跟Tina相愛多年仍經常被拍得拖手行街街，好似早前下午5時許，任氏夫婦又撇低仔女去淺水灣拍拖。當日，全黑Look的小齊先陪老婆去運動舖睇救生衣，Tina拎起一件Sharp黃色款試上身，「廿四孝老公」熟練地接過Chanel手袋孭上膊，仲細心地彎腰替對方整理好件衫，惜逛了約15分鐘，最終都唔啱心水冇幫襯。

老婆大晒
之後，這對老夫老妻便手牽手行去Coffee Shop買咖啡、麵包，沿途見到日落美景，他們更駐足舉機玩自拍。當Tina在店內等嘢食時，工作繁忙的小齊就趁機喺門外覆Message，但一見到老婆行出嚟，他即秒速收機上前幫手拎嘢，並化身「小齊子」扶實對方落一級樓梯。離開時，路經一間餐廳的二人又巧遇相熟的店員，兩公婆亦Nice爆停低跟對方吹咗陣水，其間眾人更傾到哈哈大笑；落區玩足半個鐘，小齊先傍實太太上七人車返屋企。事隔數日，他又飛回台灣接受隔離，為將於明日（19日）在老家彰化舉行的祈福晚會演出作準備。