【惹火】發表抗疫感受感激身為中國人周柏豪被唔同政見網民洗版式追擊

2020-12-17 20:52

仲有唔夠半個月就送走2020，疫情下今年令全球陷入困局，工作大減嘅周柏豪「大文豪」上身，今午在facebook專頁出post，貼出抱B女相有感而發留言：「2020年，過得驚心動魄，一個疫症看透了一個進退失據，脆弱無助的世界，不得不心存感激自己身為一個中國人，活在一個為抗疫上下一心的國家，在庇蔭下令我與家人過上健康和順的日子，2020快要結束，新一年會更好。」

雖然係一個溫馨帖子，但惹來一眾網民洗版式追擊，唔少唔同政見嘅網民鬧爆他冇良心，表明會unlike他。網民留言表示：「做人呢，應該飲水思源，記得喺邊度地方由寂寂冇名到紅透半邊天嘛？還記得你由同天空到百年不合係邊個度嘅人支持你嘅碟嘛？還記得由九展到紅館係咩年齡層嘅人食炒價都買飛睇你演唱會嘛？不過算啦，當係最後一次係度comment，已unlike。」、「喜歡你10年，從來冇失望，𠵱家你真係令我好失望。」、「唔出聲冇人話你啞！」不過，凡事總有支持聲音，都有鐵粉和議留言：「多謝柏豪正面訊息」、「欣賞你，支持你。」有啲中立派見柏豪處於兩難局面，無奈說：「其實好好哋，點解冇嗱嗱又講返呢啲嘢？唉！」