【犧牲色相】忽然冇眉變膠味男神　Edan@MIRROR化身「王小虎」抗宿敵

2020-12-15 16:30

ViuTV原創劇《男排女將》本星期進入結局篇，今晚將上演由「家瑜」鄧麗欣帶領的排球隊「力圖」對戰宿敵「翔鷹」。除了網民期待已久的復仇之戰，相信昨晚睇到預告的一眾劇迷都忍唔住爆笑，因為飾演「阿神」的MIRROR成員Edan（呂爵安）成條眉冇咗！ViuTV今日亦在社交平台上載Edan「冇眉」劇照並留言：「眼利嘅各位，相信睇劇照嘅時候曾經發現阿神堂眉出現咗啲問題。至於點解冇咗條眉，留番畀大家今晚9點半慢慢了解。」相片可見，冇咗條眉的Edan被一班「力圖」隊友恥笑，對戰時要以「王小虎」Look現身，「翔鷹」隊員更揚言要「扯甩佢條眉」。

Edan的搞笑造型雖然未正式播出，但已引來一班網民關注。有人留言問Edan是否要為入ERROR鋪路，亦有人笑指遮住眉毛的遮瑕膏應該好好用。其實Edan早前接受《頭條日報》專訪時透露過自己的角色特質其實是靚仔，不過發生好多騎呢事，令「萬人迷多咗份膠味」。當時MIRROR隊友Anson Lo（盧瀚霆）及Jer（柳應廷）更笑Edan是將角色扭轉咗，如今Edan終於可以平反嘞。