【獨家】同細女繞住手行街如姊妹　60歲毛舜筠周街捽鼻好危險

上個月啱啱60歲嘅毛舜筠就真係美魔女嘞，Keep到身形冇發福，五官又唔膠，呢點好重要。日前就見到毛姐同20歲細女區亦山去銅鑼灣行街，兩個人繞晒手好溫馨，期間毛姐突然鼻痕，見佢除口罩係咁捽，雖然毛姐都算小心，拎住紙巾慢慢捽，不過周圍好多人喎，有啲危險啫。採訪：梁志明

對毛舜筠上個月慶祝60歲生日好有印象，因為1984年喺劇集《鹿鼎記》中飾演「韋小寶」嘅梁朝偉，亦為當年其中一位老婆仔「沐劍屏」即係毛舜筠出山賀壽，正印老婆劉嘉玲及吳君如都有現身，張生日合照超經典。

幸福人辦
當日夜晚七點，毛舜筠同細女繞住手由百德新街行去皇室堡，一見SEPHORA即入，兩母女各自睇嘢，一個專攻護膚品，一個就情傾化妝品，行足20分鐘，阿媽冇嘢啱，阿女就買到嘢。離開時，正等過馬路嘅毛姐突然拉開口罩，用紙巾係咁捽鼻，周圍咁多人行過，動作相當高危。正享受人生嘅毛姐好幸福，有囡囡陪行街之餘，月前佢出席活動，亦有老公揸車接送。因為開心所以唔識老，難怪毛姐咁鬼Young。