【獨家】豁出去同羅天宇激咀 龔嘉欣最愛開工唔嫁住

為硬撼ViuTV嘅《全民造星III》，無綫將10點半時段改播題材貼地新劇《香港愛情故事》。劇中龔嘉欣、羅天宇除咗有唔少Kiss戲及牀戲外，仲會玩夫妻間情趣玩意，係兩人入行以嚟最大突破，最激情一次。天宇大讚嘉欣好咀，嘉欣就形容今次拍到豁咗出去，笑說：「夠啦，係極限。」採訪：方騫平

因為講土地問題，第一集一開波就講冇錢買樓嘅情侶羅天宇同龔嘉欣租唔到酒店慶祝拍拖七周年，臨時改去時鐘酒店「爆房」，故兩人要爭分奪秒，一入房就激咀，可惜嘉欣着住情趣內衣，解完一輪經已夠鐘要交房…而尾段講到羅天宇在小巴上跪地向嘉欣求婚，承諾以後給她一個家，唔會要她周圍「爆房」。

用酒精抹嘴拍Kiss戲
在小巴拍完煞科戲，首做男一的羅天宇拍到眼濕濕，同劇組建立咗感情，戲外忍不住同嘉欣情深擁抱，嘉欣大讚天宇鏡頭前後都係暖男。對於喺疫情下拍咀嘴戲，兩人保持個人衛生，用酒精抹嘴，食薄荷香口膠殺菌，拍牀戲時仲會換埋新牀單，而且肯定成個劇組冇外遊。另外，嘉欣「疫」市升做業主，孭住層樓坦言壓力更大，當日啱價就入市，只想有個安樂窩，無奈疫情影響到工作量，好彩平日有儲蓄習慣。羅天宇非常羨慕：「我大過佢，比佢早一年出道，但我連首期都儲唔到呀！𠵱家同緊屋企人住咋。」嘉欣強調唔係富貴咗，「大馬火鍋店係同朋友合資，識我嘅人都知我係慳妹，好愛儲蓄。」仲自爆16歲做model時經已儲到20萬：「有工開我會好開心，幾辛苦都要做嘢，唔會咁快嫁，工作對我嚟講排第一位，而且藝人唔容易搵對象，你揀人，人揀你，做藝人另一半壓力太大，唔係個個做到。」