【独家】豁出去同罗天宇激咀 龚嘉欣最爱开工唔嫁住

为硬撼ViuTV嘅《全民造星III》，无綫将10点半时段改播题材贴地新剧《香港爱情故事》。剧中龚嘉欣、罗天宇除咗有唔少Kiss戏及牀戏外，仲会玩夫妻间情趣玩意，系两人入行以嚟最大突破，最激情一次。天宇大赞嘉欣好咀，嘉欣就形容今次拍到豁咗出去，笑说：「够啦，系极限。」采访：方骞平

因为讲土地问题，第一集一开波就讲冇钱买楼嘅情侣罗天宇同龚嘉欣租唔到酒店庆祝拍拖七周年，临时改去时钟酒店「爆房」，故两人要争分夺秒，一入房就激咀，可惜嘉欣着住情趣内衣，解完一轮经已够钟要交房…而尾段讲到罗天宇在小巴上跪地向嘉欣求婚，承诺以后给她一个家，唔会要她周围「爆房」。

用酒精抹嘴拍Kiss戏
在小巴拍完煞科戏，首做男一的罗天宇拍到眼湿湿，同剧组建立咗感情，戏外忍不住同嘉欣情深拥抱，嘉欣大赞天宇镜头前后都系暖男。对于喺疫情下拍咀嘴戏，两人保持个人卫生，用酒精抹嘴，食薄荷香口胶杀菌，拍牀戏时仲会换埋新牀单，而且肯定成个剧组冇外游。另外，嘉欣「疫」市升做业主，孭住层楼坦言压力更大，当日啱价就入市，只想有个安乐窝，无奈疫情影响到工作量，好彩平日有储蓄习惯。罗天宇非常羡慕：「我大过佢，比佢早一年出道，但我连首期都储唔到呀！𠵱家同紧屋企人住咋。」嘉欣强调唔系富贵咗，「大马火锅店系同朋友合资，识我嘅人都知我系悭妹，好爱储蓄。」仲自爆16岁做model时经已储到20万：「有工开我会好开心，几辛苦都要做嘢，唔会咁快嫁，工作对我嚟讲排第一位，而且艺人唔容易搵对象，你拣人，人拣你，做艺人另一半压力太大，唔系个个做到。」