Jessica@SG結婚一周年再拍婚紗廣告 驚訝香港超多大自然靚景

女子組合Super Girls成員蔡明思(Jessica)去年底與拍拖6年的圈外男友Steven結婚，適逢結婚一周年，去年曾為二人拍婚紗相的婚禮公司，再次邀請二人「夫妻檔」擔任代言人拍攝婚紗廣告。

事隔一年再穿起婚紗，Jessica直言非常開心：「感謝客戶邀請，喺結婚一周年當日去影相，又可以順道慶祝，而且好多人見到我着婚紗影相都恭喜我，當我係新婚，感覺自己好似由上年keep住被人祝福到今年。」Jessica表示由於疫情關係，今次拍攝只能留在香港，未能如去年一樣到日本取景，但Jessica與老公對行程亦相當滿意，又自言是「大鄉里」，表示從不知道香港有很多景色優美的婚照拍攝地方，她說：「我唔知道香港有咁多咁靚地方，老公非常開心，因為佢好鍾意行山，去一啲未去過地方，好似去咗大欖涌、南生圍、錦田紅磚屋拍攝，對我哋嚟講好新鮮。」Jessica更以「震撼」來形容大欖涌的景色，她笑說︰「我唔知道香港有咁多咁靚嘅大自然地方，靚到我覺得有啲震撼，好似去咗外國。上年去日本影結婚相同今次都係同一班拍攝團隊，大家見到咁靚嘅景，都話唔洗去日本影，去呢到就可以。」

疫情期間，Jessica與老公都發福不少，她表示為了今次拍攝，事前不停做運動修身，相反老公則「偷懶」，拍攝前一日才「臨急抱佛腳」，她說︰「因為疫情大家唔可以成日外出，加上我近排經常下廚拍攝節目，成日搵老公試食，呢段時間佢都肥咗好多，我話我要減肥叫埋老公一齊減，但佢唔係好跟我去做運動，反而係臨急抱佛腳，拍攝前一日同我講唔食晚飯，不過一日唔食應該唔會有好大差別。」



提到結婚周年禮物，Jessica表示不要老公送手袋鑽飾，而是希望老公送洗碗機，她笑言︰「之前我同佢講咗好多次，但佢一直唔買，因為佢覺得唔係人手洗唔乾淨，有一次Yanny特登喺我老公面前大讚部洗碗機有幾好，比人手洗更乾淨，我老公聽完後就去買畀我，我都好鍾意呢份禮物，好開心，因為唔怕有『主婦手』。」