拍飲食節目令事業更上一層樓 衛詩雅逆市吸4廣告

衛詩雅（Michelle）頻頻拍攝飲食節目《衛食攻略》，帶網民周圍食好西兼貼地介紹茶餐廳，大受網民歡迎，每集均達到十萬點擊率，其個人頻道日前更超過10萬人訂閱，更獲頒發獎座。

Michelle坦言當初拍攝只為興趣，因為她十分喜歡吃，特別是茶餐廳，更會瓹窿瓹罅尋找隱世茶餐廳。她說：「由自己一個興趣，變咗一個令我事業更上一層樓嘅一個梯級，所以我覺得好幸運。」將興趣變成工作，Michelle表示有得有失，失去的是一向纖瘦的身材，「確實有一段時間肥咗好多，因為有時一日晏晝會食3間茶餐廳，嗌幾多我都會食晒，唔會浪費食物。甚至乎off咗機，我覺得好食我都會再嗌。所以有一段時間公司同我講：『你真係脹咗好多啦喎！』，叫我唔好再食，食少兩間。所以之後拍完嗰晚就食少餐，要勤力跑步做運動。」
Michelle又表示網民的評論，她全部都有看，還會互動，當看到網民介紹給她的餐廳，她真的會去試。
除了得到網民支持，Michelle亦得到不同類型的廣告商合作，在逆市情況下，今年她已接下4個廣告，可謂豬籠入水。Michelle表示：「我覺得自己非常之幸運，有一樣嘢好開心就係好多時候屋企人或者朋友喺街見到我嘅廣告，佢哋會合照再send返畀我，我覺得好似距離拉近咗，因為依家比較少出街，但係大家可『合照』，個感覺好得意。」