【人人自危】「娛樂圈群組」增添1人感染  阮小儀喉痛肚屙疑神疑鬼

新冠肺炎「娛樂圈感染群組」新增多劉少君1人，合共有5人確診，引起娛樂圈大恐慌。由於確診宣傳人員阿佳喺病毒潛伏期內到過電台及電視台，人人自危。商台DJ阮小儀自爆中招疑雲！

 

今朝她主持電台節目《早霸王》時說：「之前開始喉嚨痛，噚日仲肚屙，驚到好似有絕症咁，但又唔敢話畀媽媽同身邊人知，好彩肚瀉原來係食咗中藥嘅反應，屙咗一次後，今天已經冇乜事喇，所有嘢都完全正常，都冇咁驚，原來只係自己嚇自己。」小儀接受本報訪問時，強調其實冇見過佳哥，只係有啲擔心，自己疑神疑鬼啫，本身有做足防疫，都應該OK嘅。她說：「大家一齊加油啦！」又呼籲大家忍多陣，希望香港好快冇晒事，大家就可以繼續過正常生活了。

 
商台DJ梁文禮檢測報告呈陰性
而另一DJ梁文禮喺上星期五節目中訪問過新人謝高晉，當時由佳哥帶嚟電台，當收到佳哥確診消息後即晚去醫院檢驗，尋日收到通知話初步測試呈陰性，他在IG留言報喜：「話說，星期六(18/7)一做完”903豁達推介”真係5pm一報完時就洗版式收到msg:佳哥確診咗！佳哥就係大家睇報道所形容為freelance宣傳人員，而佳哥係喺星期五(17/7)帶新人謝高晉嚟我節目做訪問。一收到呢個消息，即通知公司，留咗喺電台唔敢走住，當日夜晚即同接觸過佳哥嘅阿金、阿傳一齊去檢驗，喺醫院折騰咗兩個幾三個鐘，拎個樽返去第二朝留唾液再交番醫院，今朝收到醫館局訊息。

雖然呢個初步測試陰性，但係都唔代表100%無感染，所以呢兩日都唔會返去做節目住，盡量留喺屋企。最後想講嘅係，啲菌越來越近，梗有一個喺左近，大家要無時無刻都帶罩，唔好有身體接觸，洗多啲手，少啲岀街，祝大家身體健康，送上呢期最啱聽兩首歌 : @rubberband 百毒不侵 @hui_alfred NEGATIVE」