【隔離營生活】自爆熱到要日沖6次涼　謝高晉凌晨「省」煲淥杯麵食

現役籃球員兼歌手謝高晉的經理人劉麗萍（Apple姐）、師姐施匡翹（Zaina）和宣傳人員於本月18日同告確診新冠肺炎，事後他第一時間到東區醫院做檢測，雖然報告呈陰性，但因被列為緊密接觸者，故前日（19日）接獲衛生署通知需要入住隔離營進行檢役。謝高晉昨晚8點已抵達駿洋邨隔離營，他透露因入營前沒有食飯，經過多次詢求後，終於在凌晨近1點獲派杯麵醫肚，惜從其IG Story貼出的影片睇到，屋內設有的電煲沾滿污垢，謝高晉輕輕一刮便成隻手指黑晒，搞到要自己半夜「省」完個煲，先可以煲水淥杯麵食！

謝高晉今日透過電話表示：「嚟到呢度後，每日需要早、晚自己探熱，紀錄」喺張紙度﹒唯一比較唔習慣係冇冷氣，所以日出嘅時候就會熱醒，同埋可能本身比較多汗，一日都起碼沖5、6次涼。」並謂下午會健身、睇電視、練琴消磨時間。另外，在伊利沙伯醫院隔離病房接受治療的Apple姐，日前驗出體內新冠肺炎病毒指數接近「零」，所有檢查報告都顯示逐漸康復中，她今日精神奕奕地透過電話交代病況：「都係OK呀，冇乜問題。今朝醫生打嚟話會再驗血同照肺，跟住24號再做多次深喉唾液測試，睇吓會唔會係Negative（陰性）。」