【獨家】為男友唔接太性感演出　鍾采羲未Ready結婚但想生B

自從拍竣劇集《荷里活有個大老千》後，人稱「E級超蓮」的鍾采羲（Iris）已有兩年多冇作品面世，今年5月忽傳年底下嫁從事金融的舊同學，問到是否「收山」做少奶奶？Iris否認：「完全唔係！」並解釋只是一直忙於籌備生活美容概念店，由於舖頭於年初啟業，目前生意已上軌道，故打算下半年重返幕前，「之前接咗啲中港合拍片，剛好疫情返唔到國內，希望8、9月返到去。」提到男友，Iris即落閘：「唉，唔好講我男友，唔穩定呀，可能好快就冇！」唔通有暗湧？撰文：黎寶倫　攝影：譚壹致　場地：SKIN RETREAT

為了以最佳狀態「復出」幕前，鍾采羲近日積極到自家美容店做機修身，還成為「生招牌」，頻頻於社交網貼水着照晒修身成果，未知男友會否介意她Po性感相呢？Iris笑謂：「太性感唔好，其實我啲相都喺Focus落背景、個人唔大，所以好啲，有時佢都會叫我Remove。（性感演出？）近年都冇接好大膽，太爆自己都唔會接。」說到早前因貼出婚紗照惹來結婚傳聞，她稱只為晚裝店拍宣傳照，並謂擔心「一講就散」不欲多談男友。

希望美容生意打入內地
不過32歲的Iris坦言想過兩年生B，「希望追到進度，但首先要搵個對象。（現任呢？）都可能會嘅，唔知呀，到時會通知大家。」答得如此不肯定，難道跟對方冷戰中？她否認：「唔係，只係自己不嬲感情唔太好，又暫時未去到結婚咁認真一步啫。（男友欠缺咩？）可能係我唔好、我未Ready呢！通常一隻手掌拍唔響，我比較自我同講感覺，所以比較麻煩。（父母催婚？）佢哋都希望我快啲結婚，呢幾年啦，40歲前，哈哈！」Iris稱現時先專注工作，會兼顧拍戲和美容生意，目標數年後打入內地市場。