【頭條獨家】戴黑超有型行街突有便意 尹光轉蒙面Look公廁「卸貨」

有「廟街歌王」之稱的尹光，雖然年屆72，但仍寶刀未老，今年仲同唱片公司續約10年，唱到2029年都仲得！日前他與愛妻李麗儀去筲箕灣行超市及睇看家品，型爆戴超的他更被fans截停集郵，兩公婆行到街尾，尹光突然除黑超兼戴口罩，原來佢人有三急要去公廁「解決」，佢太太在樓下等足20分鐘，歌王現身時成個人爽晒，跟住仲即刻變回原本個黑超look，睇嚟喺公廁卸咗好多貨喎！採訪：李維隆

尹光有大量經典歌，如《荷里活大酒店》和《你阿媽大減價》，唱到而家都仲唱緊，剛跟唱片公司續約10年的他表示會唱到82歲，他笑言：「就算到時我唱到冇晒牙，咁咪整假牙囉；就算行唔到，我咪坐輪椅、用拐杖唱囉！」永不言休嘅歌王真係好熱愛唱歌，佢仲話未來會繼續唱rap，每年會舉行粵曲及流行曲演唱會，還會到不同地方登台，Fans好有福！

秘秘密密去公廁
日前尹光同太太現身筲箕灣東大街，戴住黑超的前者行咗一陣已經被兩女一男Fans認出，拉住佢要影合照，尹光無任歡迎，仲逐個逐個影添。之後尹氏夫婦去咗零食店睇餅乾，睇咗一陣冇嘢啱，再過隔離舖頭睇家品，齋行無入手。跟住尹光突然急急腳行到街尾，除低黑超、戴上口罩的再走上1樓的公廁，見尹太在樓下等了足足20分鐘，尹光終於鬆晒落返嚟。一搞掂，他又除低口罩戴番副超，話晒歌王點可以畀人見到去公廁，明嘅。