【頭條名人】隨鄭明明赴美交流 羅霖學美容等吸金

羅霖（Candy）現母兼父職照顧三個仔和養家，因嚟緊會成為一間上海美容院嘅合夥人，為咗學多啲嘢，早前她跟隨鄭明明到美國芝加哥出席國際性美容協會Cidesco嘅活動，聽講座和了解最新嘅美容儀器，又可以交流美容心得，她更開心恭賀明明姐奪得大會頒發嘅榮譽大獎。由於今次屬學術交流，即使是首次到芝加哥，她都冇乜時間去遊覽和shopping，最難是適應時差，笑言可能真的年紀大了！  撰文：李佩儀

Candy表示歡迎會有32個國家參加，非常熱鬧，活動除咗聽美容講座，又有很多最新嘅美容儀器介紹，她說：「有一日我哋仲去參觀全芝加哥最大嘅美容院，裏面仲有髮型屋、修甲和按摩等，真係大開眼界！」今次她還要恭喜明明姐，因她獲大會頒發「美業專業貢獻功績勳章」，實在可喜可賀！而Candy最難忘是閉幕禮，因為各地代表團要着民族服飾出席，身材好fit嘅佢以旗袍上陣。問她事前要keep fit嗎？她笑言：「好在之前出完美容書到𠵱家都冇肥番。」

去過美國好多次嘅Candy，首度去芝加哥，可惜因行程緊密難抽時間周圍遊覽，就算係shopping都只係買維他命。加上當地唔算好多美食，有一晚大會安排她們到99餐廳吃自助餐，在99樓睇靚景無得頂，惜食物一般，平時她多數去酒店附近食中菜。而今次最難適應是時差，她說：「我好怕飛美國，因為時差問題幾嚴重，成日都係日頭眼瞓、夜晚瞓唔着，以前做空姐冇呢個問題，可能真係年紀大咗！」她續稱今次學到好多嘢，對嚟緊在上海任美容院合夥人都有幫助。