專注力不足致高中輟學 王敏德考機師牌彌補兒時遺憾

由陳慧珊（Flora）親自監製及主持的節目《放學後》，最新一集邀請到王敏德（Michael）擔任嘉賓。作為三子女爸爸的Michael，剖白了在單親家庭成長的故事，如何在種族歧視、學習困難等逆境中，發揮自強不息的精神。

身為中、法、荷蘭混血兒的Michael在節目中透露，自小父母離異，並在欠缺安全感的環境下長大：「我喺紐約州首府柯巴利長大，附近一個中國人都冇。香港人、中國人會覺得我係西洋人；但美國嘅白人認為我係中國人，所以學校嘅人會畀種族歧視嘅花名你。14歲升高中時，我哋搬到加州一個小鎮，學校入面得我同哥哥Russell兩個中國人，好彩我哋有運動天分，令隊伍成日勝出，所以好受歡迎，否則一定會被人睇唔起。」

Michael表示在學習上也遇到困難，「年輕時我唔鍾意讀書，高中就輟學，我覺得我喺學習時太急進、太緊張。我記得有個朋友嘅媽媽話我專注力有問題，其實佢算係講中咗。」這些年，他靠學鋼琴、高爾夫球和直升機來鍛練自己的耐心、恆心和決心，他坦言：「我學揸直升機，係有啲補償作用，因為我冇讀過大學，但揸直升機係要學好多科目，例如氣象學、領航術、航空法律同人體工學等等。」

他提到考取商業機師執照時都好辛酸，「要學直升機都要去美國、英國同澳洲學，然後喺當地考取執照，我喺14個考試中通過咗13個，但「電子自動導航」呢個我總係唔合格，我考過好多次，只係為咗全部通過。本來我以為會放棄，但最後都成功咗，整個過程足足花咗24個月，我為商業機師執照用咗3年時間。當我攞到呢個執照時，算係補償我年輕時冇畢業，增加番我嘅自我認同。」

而家人從來是他最強大的後盾，Michael因為工作，錯失與家人相處的時間，令他常常產生歉意，尤其覺得唔夠時間陪兒子王躍穎（Kadin），所以會帶Kadin到湖邊傾偈，Kadin亦向父親深情告白：「作為你個仔，我好想借呢個機會多謝你。」二人亦透過分享魔術小道具，展開了父子間最窩心的對話。