星級萬聖節 陳豪茵媺一家五口 化身「吸血殭屍家族」

萬聖節奉旨扮鬼扮馬，好多大人就想呃Like，小朋友又最想得到乜嘢呢？茵媺啱啱就分享咗佢嘅親身體驗～～
話說茵媺響社交網站分享咗兩張新相，可見佢哋一家化身「吸血殭屍家族」！三位小朋友看似好投入，茵媺和愛女Camilla「張牙舞爪」，七情上面，認真應節。茵媺透露，原來第一張相係茵媺同仔女響參加萬聖節派對前影嘅，陳豪就身在大馬進行拍攝工作。
等陳豪返嚟，一家五口再影一張「恐佈」全家福，陳豪好投入做殭屍爸爸，揚起披肩勁有氣勢！茵媺就笑言，三位仔女第一次好投入扮鬼扮馬係因為有糖果，今次就睇嚟無咁投入嘞！