古巨基大爆容祖兒「瘀事」 仲問觀眾有冇Air Drop：我有片

容祖兒紅館演唱會昨晚踏入第18場，進入倒數階段，請來古巨基任嘉賓，出名多手汗的基仔與祖兒合唱完《愛得太遲》後，搞笑問：「阿祖，係咪要摸下我濕滑隻手先？」祖兒反問:「你個枝野咩來？」基仔答到好暖昧，「我枝野又黑鼆鼆，又毛鬙鬙.....」已經引得觀眾大笑，以為他講黃色笑話，原來係講緊佢枝咪套，「係一條羽毛球柄的毛巾套呀！因為我呢幾年整壞左不知幾多枝咪，成八萬幾蚊一枝。因為手汗太大，一揮手成枝咪飛走左。」

其後，基仔更大爆祖兒的「瘀事」:「我地識左十幾年，係近幾年先特別熟，多左好多聚會。」連續開了多晚演唱會祖兒一聽到這裡，隨即「警覺」到：「你又爆料？乜成公司都係咁......」基仔笑說：「綵排個陣又係你話乜都講得嘅，哈哈！你唱歌跳舞得大家都知，大家想不想聽容祖兒平時生活傻瓜野？」

觀眾即熱烈和應，基仔續說：「事緣係咁，阿祖係一個好乖唔識飲酒嘅女仔，同我一樣....」祖兒即反駁，「同你一樣？哈哈，你係酒筲基......」基仔就將矛頭推向經理人霍汶希（Mani）：「Mani教我地飲酒 ，我真係唔識唔鐘意架....哈哈！有一次Mani同你來我家食飯，你前面有個朋友生日，遲左到，咁你係我樓下按對講機，Mani咪即刻落去接你，你記唔記得？但係接左你上來之後， Mani 話，「佢呀，係樓下，保安同佢講，容小姐你可以入去，佢話：『你點知我姓容架！』，嚇到Mani即刻扯你走。」

觀眾聽到這裡已經狂笑，祖兒都一樣，笑到差D企唔穩，「我唔記得啦！哈哈哈.....」基仔再接著說，「未講完呀我，你上到我屋企已經wing wing地，你第一件事坐係地下 跟住向天不停發功，我以為你整整下成個人可以飛起」。此時祖兒已經笑到成個人跪係到，但係基仔沒有停，「仲有呀！跟住你入左廁所，我地班朋友話，喂佢入左好內，駛唔駛睇下佢，Mani就不停敲門，但你冇反應，之後個門鎖鬆開左，大家只係見到你攬住個屎塔呀。我地扶你起身，你話，基仔！我發誓呢度係我嚟過最好玩地方！我唔知個馬桶咁好玩架，早知我都玩下啦！」語畢，祖兒已經笑到倒地。

祖兒之後說：「我剩係記得古巨基不停塞我食野，慌死我唔死，係咁塞我，你話我唔嘔都難啦。多謝你，你今晚非常精彩 ，值得大家掌聲，連我自己都唔記得。」

基仔這時忽然問觀眾，「想問下各位想唔想睇片？ 其實我有當晚條片，我對朋友好好，我唔會出賣朋友，除非佢係fans叫！」觀眾當然就馬上起哄狂叫要睇，「我有帶手機來，有冇air drop ？不如一次過 ？」又再引來大家歡呼及大笑。