祖兒願做代母 軒仔：珍惜做朋友緣份就夠架啦

容祖兒昨晚舉行第16場演唱會，輪到大會星級調音師兼好朋友張敬軒登場，軒仔台上一番言論，搞到祖兒又喊又笑，最後更感動到自爆為了報答軒仔晚晚無條件照顧，將來軒仔如果搵不到女朋友會幫軒仔生仔，她可以做代母！成晚溫情滿分，又笑到大家肚痛。

昨晚祖兒唱完《特別嘉賓》無特別介紹軒仔，欺騙觀眾話，「你地唔好以為每日都有嘉賓得架，我今日唱一首我好鐘意歌」然後就唱《黃色大門》，唱到一半舞台升起， 張敬軒登場，觀眾即起哄歡呼。兩人唱完後，祖兒話：「各位觀眾！你今晚有福啦！」張敬軒就錫錫擁抱祖兒，「good 個騷先。」 

軒仔又從袋中抽出一張小咭片，「呢一張係我哋陪伴咗容祖兒咁多晚，佢後台身邊梳化服同事一齊簽比你的一份小禮物。大家知唔知係佢這副瘦削身驅、咁大條裙入面包住背後， 冇人睇到佢身上幾多傷，我有幸可以睇到。你平日著衫係「瀡」入去，好似啲馬路咁暢通。我係後台見到佢好少布嘅時侯……」祖兒馬上震驚問:「吓？ 乜你有入來咩？」「我耐唔耐會『裝』下，你唔好信啲野寫先得架，我會裝下...」「你無賴呀....」軒仔就安慰祖兒，「算啦，睇完都唔知睇到乜。」觀眾也為了捧腹大笑。

軒仔再正經講，「大家留意下，佢剩係腳範圍，每日貼膠布著演出高跟鞋，佢皮外傷、 內傷.......今日開騷前重去針灸同睇骨科。我係台底十幾晚，我每晚都覺得容祖兒係值得所有最好野係佢身上發生。」觀眾即報以掌聲及歡呼聲。「祖兒係騷前，好擔心好擔心唔可以將最好狀態帶上舞台到，佢怕自己令大家失望，佢不斷付出自己，佢真係搵命搏，我未見過一個Artist ，凌晨完騷喉嚨重插住6枝針，就係為左保証第二日有一個最好狀態見大家！」

祖兒聽到呢到已經忍不住飙淚，大滴大滴淚水流落，歌迷大叫祖兒唔好喊，軒仔就攬攬示意安慰，再繼續講，「我成日覺得佢無論生活當中，舞台上都係一個好榜樣。有一晚我同方文燕先生幫祖兒做耳機檢聽，但是出左少少判斷問題，我晚上打俾佢，佢竟然係咁，將問題罷係自己度，話唔係呀，係我今晚唱得唔好。係我問題。點解佢有咁好演唱會，咁好team, 咁好嘅觀眾，大家明啦。」祖兒就好感動，「點解會有個咁好朋友，成件事唔關佢事，佢有好多野忙 ，又開餐廳，11月又開自己嗰個啲打騷 ....」軒仔斗正，「我係中樂團！啲打係呢度行過少少就係。」祖兒即破涕為笑，話其實軒仔不用晚晚出現，不過軒仔就話出現得好開心，學到好多野，「係我地這行業好多人話一運二命三風水 ，但係冇架，上帝好公平，你付出幾多收鑊幾多。你付出幾多汗水努力觀眾係會見到！」觀眾又即報以熱烈掌聲。

「多謝你張敬軒，估不到你講野咁溫情。」祖兒突然好凝重咁話，「我諗過對佢最大報答，我諗過架。」軒仔: 「唔駛以身相許啦 」料不到祖兒不是說以身相許，而是爆出: 「如果你需要一個人，將來識不到一個女朋友都好，我可以做代母，係泰國捐精，哈哈哈.....」觀眾笑到反眼時，張敬軒都嚇一跳笑住話，「咁我泰國搵得啦....」祖兒叉腰反問: 「 做咩依家好失禮你咩？我差啲咩？」軒仔一額汗，「你啲基因 .....都好好.....我覺得呢世珍惜做朋友緣份就夠架啦 ，咪第時我去你屋企，我應該叫你媽咪外母好，定Aunit好？有單身男士，真係可以上ig留下言俾祖兒」 

然後兩人合唱《櫻花樹下》，唱完觀眾無一捨得讓軒仔離開，不停叫安歌。軒仔於是話，「以往啲嘉賓唱上來兩首，同大家say個Hi ，兩梳蕉咁上來。我有啲唔同，既然大家咁熱情，我決定我今晚要表演一樣嘢，你台下Quick Change，我要做第一個台上表演QuickChange 嘉賓！」接著大會關燈，讓軒仔換上一件區有火龍果的紅白色外套。現場燈亮，祖兒就即大叫，「Oh MyGod 好肉酸呀。重著埋我件T………人地話娛樂圈養鬼仔我唔信呀，佢今日真係帶左隻鬼仔上來。你係邊個，你咪樂壇妖孽同火龍果姐姐 ？好得人驚呀大佬。」

軒仔就作狀乩童，又叫祖兒撳佢人中，然後火龍果姐上身，「hello 大家好嗎，大家有冇聽過我首pretty hungry，你地今晚 hun唔 hungry，hungry，就俾啲尖叫我聽 。大家知不知我來做咩 ，踩場呀！」觀眾瘋狂歡呼，祖兒: 「點呀，話曬今日個場係我，你第時開第時再算啦，唱未呀。」火龍果姐說 :「人地講我都唔信，啲樂壇前輩特別難搞。廢事罰錢。今晚歌就唱梗，我帶左少少手信，就中秋有啲生果，係你椅底！啲火龍果講明係唔食得，用來罷設，用來迮年！只要你有火龍果，你就要同我一齊唱同跳這呢首歌。送比大家 pretty hungry！」觀眾就開心到飛起，不停搵椅底，抽到火龍果的就不停揮舞。