容祖兒公然送抱摸面 劉德華自爆好色：搞咗個小龍女出嚟

容祖兒紅館個唱昨晚舉行第12場，祖兒未宣佈是晚特別嘉賓前，先抖啖大氣說：「今晚呢，呢個一啲都唔簡單，我稱唔上同佢好好朋友，因為佢喺我心目中係遙不可及，早已超越了偶像，是我學習嘅傍樣。佢做事認真，待人接物，及對身邊所有人無微不致，總之佢叫我行東我不會行南，佢叫我坐我不會企！今晚好榮幸邀請到佢上嚟我呢個舞台，請大家以最熱烈掌聲，歡迎我今日嘅VIP！」
音樂響起，祖兒唱出劉德華的《謝謝你的愛》，觀眾為之瘋狂。華仔上台，祖兒馬上飛撲上前，攬到實一實不肯放，然後面紅紅叫道：「好近呀，救命呀！我想暈低。」華仔笑住回應：「我好少抱啲咁後生嘅細路女。」祖兒問：「點解你咁靚仔？」華仔回話：「我天生。好多時都同人講，唱歌跳舞可以勤力去練，但係靚仔真係冇得練。」祖兒這時又來心心眼問：「我可不可以摸你一下？」然後伸手摸華仔塊面，引得觀眾都嘩嘩大叫。

華仔問祖兒：「點解請我做嘉賓？你都唔係我個年代…」祖兒說：「你唔記得咗，我哋有一年一齊拎獎。」華仔謂：「記得，我好似帶住個女去拎獎一樣。2004年？定邊年？」祖兒又話：「我想話你知，我第一次入紅館睇演唱會，就係睇你《夏日fiesta演唱會》，同我個初戀。」華仔開玩笑說：「哦，當年我見到個嘴唇厚厚，同個男仔係到唔知做乜嗰個…」祖兒即答：「冇呀，當年冇打車輪㗎，最多拖下手仔咋。但係我一直覺得你首《開心馬騮》係唱畀我聽，因為我屬馬騮！」繼而說不如一齊唱啦，就開始清唱《開心馬騮》給華仔聽，十分搞笑。

華仔同祖兒講：「我話你聽，我為乜接受嚟做嘉賓。」祖兒答：「因為你錫我。」華仔說：「唔係。」一大個檸檬令祖兒呆了，觀眾就大笑。華仔繼續說：「04年我哋一齊拎過一次大獎。我本來希望14又可以一齊拎，我13年已經開始準備，不過嗰年好忙，因為我好色！」祖兒一頭霧水，「咩好色？你點會，你咁勤力…哦…你講你好忙繁殖下一代呀？」
華仔說：「係呀，搞咗個小龍女出嚟。所以2024年啦！再一齊拎獎，你唔使等我，我趕緊上嚟㗎啦！另外，我個女話，你嚟睇我演唱會，由頭跳到落尾冇停，你其實唔止開18場，可以開夠28、38場。」祖兒就話：「你個女好得意呀，搵次畀我去探下佢啦。」最後兩人合唱《一起走過的日子》作結。