容祖兒講「調」字 Supper Moment：我聽咗另一個字呀

容祖兒昨晚第17場演唱會，在介紹嘉賓之前，祖兒就話日日打電話詢問她當晚是邊位嘉賓，不滿地說:「現在嘉賓係主菜，定我先係主菜，豈有此理！哈哈。我話畀大家聽，我今日唔畀主菜你哋食，直接畀個宵夜你哋嘆，準備好未？」然後Supper Moment 就升上來，觀眾馬上瘋狂歡呼，Sunny話，「永遠係香港嘅主菜，容祖兒！」繼而在觀眾瘋狂歡呼聲中，與祖兒合唱《幸福之歌》。

唱完歌，祖兒見觀眾超開心，於是話：「完全感受到Supper Moment啲威力！」Sunny就話: 「我哋Supper Moment第一次紅館四面台，係因為你呀容祖兒！」「唔好客氣，係我光榮。今次第一次合作，大家覺得點？我知大家好熟佢哋，我都要鄭重介紹一下Supper Moment四個靚仔又有才華的樂手。我今日先知Sunny叫仕燊，你時薪幾多？」

「我心裡最想合作伙伴單位，請晒來，今日大家見到係Supper Moment ，即刻問可不可以調.....即係問可不可以調來睇.....」Sunny呆一呆未反應得來，之後先笑住話，「哦，調，我聽咗另一個字呀，哈哈哈....畀人調喎....」引得全場都一齊大笑。「哎！我真係唔好講太多，哈哈哈.....你係咪有禮物送畀我？」Sunny:「係呀，我今日終於可以喺容祖兒面前告解！」觀眾一聽《告解》兩字即開心歡呼，祖兒就話，「真係連霆鋒來嗰晚都冇唱呀。」Sunny就話:「放心，我會盡量用謝霆鋒嘅腔口唱！」

此外，祖兒昨晚登上紅磡360高空吊車，第一首歌就揀了《他都不愛我》，料不到與她合唱這曲的吳浩康竟然坐在山頂位睇騷，大會馬上畀支咪阿Deep，阿Deep也不客氣，大方唱了一段，獲得不少掌聲。唱到演唱會最後安歌時段，祖兒同觀眾邊傾偈握手時，突然見到有一位女觀眾狂哭，祖兒馬上上前問，「咩事呀，你乜事呀你？」其他觀眾話: 「佢求婚呀」。祖兒搞笑問:「你騎劫我個場求婚，你上嚟啦一係，逼喺嗰度。」但個女歌迷就只係識得繼續喊爆，祖兒唯有做埋主持人，「你哋唔好咁過份喎.....係咪求婚？點解咁突然？畀我睇下你隻戒指大唔大隻先，都ok喎，咦，英皇珠寶？你係咪臥底呀，哈哈哈......」然後祖兒同女歌迷講，「載咗佢啦！ 錫啖先啦、打個車輪先，恭喜晒！」女歌迷拿住花喊住同祖兒講，「花以為送畀你」，祖兒話，「係屬於你架啦，我心領啦，我送首《華麗邂逅》畀你啦，祝你哋永結同心，恭喜晒生多幾個。」

昨晚，曾華倩，黃又南，C AllStar的陳健安，Robynn & Kendy的孫曉慧，古巨基都均有來捧場。