Twins與關智斌做嘉賓 爆容祖兒多人追

容祖兒（Joey）昨晚在紅館作第九場演出，請來了好姊妹Twins及關智斌（Kenny）擔任嘉賓，Twins大爆Joey多人追，只要有心隨時有好歸宿，而Kenny更即場宣佈加開一場。

Joey以「重量級女子組合」介紹Twins，笑說：「我們一齊長大，經歷的不是你們能夠想像的多，我曾經在她們演唱會上飲大了，上次演唱會好好玩，真係要好信得過、好有親切感、好有歸屬感，才夠膽在台上面飲！」

蔡卓妍（阿Sa）爆料，笑說：「我想話雖然容祖兒冇乜緋聞，但不要以為她冇人追，真係好多人追佢架，今日已經有幾個在場。」鍾欣潼（阿嬌）即反問「你係咪想講日本個個？」，令Joey不禁嚇一嚇，並說：「掩住你們個嘴，冇人想聽我緋聞！」

之後阿Sa又介紹她其中一位情人登場：「其中有一個好靚仔，今晚死要同你唱歌，佢好多腹肌！」隨即Kenny登場唱出《死性不改》。阿Sa笑指Kenny要準備演唱會，要加緊綵排，好姊妹阿嬌亦附和，指Kenny的演唱會賣光所有票，準備加場！Kenny笑言想自己親自宣佈，然後便在舞台中間舉起勝利手勢說：「大家好！關智斌Kenny is BORN演唱會依家正式宣佈加場！」三位女士在旁都好興奮，更齊齊宣佈已約定在Kenny的舞台上繼續盡興：「我哋都喺到，有你一定有我哋三個！」

另外，身為Joey歌迷的王灝兒（JW），亦在社交網站貼出舊照撐Joey，相中人是18年前的JW，與同學仔齊齊欣賞偶像的演唱會，她留言說：「呢個係2001年容祖兒嘅隆重登場演唱會，我當時11歲。時間真係過得好快，就咁就18年啦。」而Joey本人亦以驚訝表情回覆JW。