提早立遺囑 張敬軒：第一次簽好震撼

張敬軒今日推出新歌《感情寄生族》，是今年探討生死態度的第三部曲。《You》講述生存與尋找自我的態度；《空手而來》是在困境中掙扎求存的折磨；而這首《感情寄生族》則是面對和領悟生死的必經過程，「導演用一個葬禮去詮釋一段感情嘅一個最後嘅階段，無論情感層面、生理情感，畫上一個句號嘅時候，所有嘢就會回復平靜。」

面對生死，軒仔分享自身經歷，「過去呢一年，我都有同『死亡』好接近嘅經歷，譬如我廣州屋企養嘅一隻狗仔今年16歲走咗，陪伴咗我同爸爸媽媽好長嘅時間；之前有個舊同學，同我一樣38歲，都係走咗。」

除了身邊事物，原來軒仔亦早早為自己立下遺囑，「喺我入咗行大概6、7年，一位圈中前輩提醒我要識得規劃未來生涯，當中包括訂立遺囑。我好記我第一次上律師樓立平安紙嘅時候，簽名嗰刻係好震撼！第一年簽覺得好大吉利是，之後每年去更新嘅時候，又加咗啲新嘢入去。當你開始去模擬一個所謂葬禮嘅時候，你會知道自己最愛係邊啲人。」

這次新歌MV導演及女主角延續了《空手而來》的班底，可以說是其續集。軒仔坦言導演Sheng Wong和Matthew Chan的審美觀最吸引他，「我覺得審美對於我嘅MV嚟講，愈嚟愈重要。今次選擇喺六、七十年代嘅教堂拍攝，佢哋對畫面嘅講究和審美一啲都唔俗套。」至於女主角談善言，軒仔笑說她以後應該不會再為自己拍MV，「今日嚟到拍攝場地見到佢，咦？隻眼做乜腫晒嘅？同上次係一樣㗎！我好欣賞阿談好專業幫我演出呢個MV，佢哋今朝拍攝咗一個葬禮嘅場面，有好多情感激烈同沉重嘅場面，希望可以帶嚟更高嘅視覺美感同水平。」