認真炮製MV唔認惡搞祖兒 張敬軒：係致敬吖

張敬軒化身「火龍果」惡搞容祖兒紅館個唱海報後，已預告昨晚「軒公出片」，就連嗌要報警捉青山走犯的祖兒都幫他推出片，原來這個惡搞不惜公本，租影樓出動梳化服和舞者拍攝團隊，將祖兒的《Pretty Crazy》變《Pretty Hungry》炮製成「張敬軒有咩問題？惡搞容祖兒 Pretty Crazy MV」，製作認真。
軒仔出片後於instagram（ig）留言：「#以下片段可能會令觀眾不安 #lowcostcosplay2019擾亂樂壇新氣象 #冤枉娛樂年度露點推介 #亞熱帶醜到喊混血樂壇新人 #火龍果 #首支跳唱mv 與樂壇天后 #容祖兒 分庭抗禮 遠赴日本 #城 拍攝 #prettyhungry 現已上線 #諧星之路一去不復返 #prettycrazy容祖兒演唱會 #5月9號齊齊搶飛」。
MV推出後經過一夜，網民反應熱烈，軒仔於ig上載與祖兒版本對比的片段，無論造型和表情都笑爆網民。他留言：「今朝一早，阿 #年度亞熱帶混血新人 #火龍果 打俾我，話佢啱啱加入娛樂圈就壓力爆煲 #要開始安排退休嘅事宜 #啲傳媒同公眾嘅壓力令佢緊張到有 #神經病 #佢依家覺得自己 #prettycrazy #佢話喎 你哋一個二個話佢惡搞，佢話佢喱啲係致敬吖 #佢話囉 🙄 #唉我咩都唔知吖我你哋自己睇下喇唉」；祖兒回應：「何方妖孽，唔好再攪我好朋友，我軒仔以前好乖巧㗎，唔知點解而家攪成咁，唔好講咁多啦，一於攞筷子嚟夾佢啲手指，燒啲符水佢飲吧啦🤪」。
意想不到，很多網民對軒仔戴假髮女裝扮相讚口不絕，「呢個髮型好睇過你原本」、「其實，有啲角度，都，幾靚女，吖。」、「張生，原來你膊頭對上係幾靚女架wor！！呢個髮型顯得你仲靚！！」、「我竟然覺得佢有啲靚 我係咪癲咗」，就連蔡卓妍（阿Sa）都在軒仔發文下留言：「🤣🤣🤣🤣醜到喊咩？點解我覺得有啲靚？？🤣🤣🤣🤣」。