阿碌開咪｜國際城市唔國際化點競爭？

時Fit時肥的馬時亨，滯咗在香港兩年多後，終因工作原因，放「疫監」，大飛特飛，又飛歐洲，又飛亞洲，難得返嚟後個樣冇攰不止，更神采飛揚，四圍搵人分享所見所聞。

總結五個字——香港好大鑊（純粹小弟加鹽加醋演繹）。

首先，香港本來為一個蜚聲全球的國際城市，亦是中國唯一的國際金融中心，但就因一個疫情，推出的政策，搞到自斷兩臂，冇晒競爭力！

須知全球國際大城市分分秒秒在互鍊中，最好你唔爭氣，放軟手腳大墮後，咁我就可以一聲唔該，先搶錢財，再搶人才。然後將搶回來的落地生根，開枝散葉，等佢哋子子孫孫長遠移居，在地發展。香港以前最大優勢，為一切自由。外國專才來到此處，享受高薪低稅，處處美女美食，兼且子女教育絕冇問題，大把國際學校，簡直天之驕子。

如今是怎麼的一個樣？大家有認識走咗或還未走的外國僱員，問吓啦。唔識？也可問吓任何做國際生意的朋友，肯定滿口苦水，一五一十話你知，香港幾咁大鑊。

其他自由處處萎縮，唔講嘞。但出入境自由，真係縮龍成寸，對好多雄心勃勃想替香港打拼者，有非常大挫折感。

難怪個個問：「全世界都開晒，歐洲北美、澳洲亞洲，特別我哋對手新加坡，已回復疫前的自由出入狀態，人人可戴可不戴口罩。點解佢哋得而香港唔得？國際城市而唔係國際化，咁點競爭？又點為中國最大利益——吸外資，扮演積極角色？真有這個長期『自變疫埠』需要嗎？」

一日一萬幾千宗，聽落好多。歐洲、日本、韓國……何嘗不如是？感冒也會肺炎死人，會否犧牲成個城市的經濟及前景，去作無休止縮呀縮㗎？

總的一個「主體問題」就是：點解人哋開得，我哋唔得？

肥馬好肉緊話如今的防疫政策一定要改，不少專家也早早不停猛呼籲。老友，若果以國際賽馬論香港，唉，已經隻隻入晒直路，但我哋仍在閘前踱步！

曾智華

阿碌開咪

 

編按原題為「國際城市理應國際化」