阿碌開咪｜CommonSense防騙

新聞報道，日日都見到N種騙案，各界有齊，包括：投資、美容、減肥、壯陽、生髮、愛情、旅遊、賭博……　

世事常變，但騙術則萬變不離其宗。騙子一定出現在有錢的地方，所以，有錢就有騙子。而騙子能夠成功，因懂得心理學ABC，掌握只要能攻陷對象的貪婪及無知兩大人性弱點，就會成功。大有大呃，細有細呃。

我這一輩，不少是街童出身，童年到青年窮到燶，故此，絕少成為騙徒對象。不過，基於通街蕩，倒見盡街頭騙術，尤其在廟街、大笪地及舊街市，最多低教育水平街坊出現的地方，就有五光十色騙術畀你「參觀」。

當年我最喜歡研究睇相佬、風水佬、假藥佬、色情佬（O氹人買鹹野或上架步）、假貨佬、魚蝦蟹佬……點呃人。睇穿後，對日後保護自己，有莫大裨益。

其實說穿了，大部分騙術都可以用Common Sense防範。只要你腦筋清醒，撳住自己的貪念，再自問一些基本問題就掂。例如：一、有冇咁大隻蛤乸隨街跳？二、會有低風險高回報投資嘅咩？三、股票肯定年年有八厘回報再加升值？咁，銀行為乜要低息貸款畀人賺雞碎咁多差價啊？四、我成七十歲人有機會回復十七歲的性能力？五、我個禿頭有機會再天然生髮變又濃又密？六、阿姐我七十歲仲有機會玩「升胸奇遇記」而自然到冇人發覺？七、我靠不停整容可以回復青春？八、有工作會毋須學歷及經驗而有百萬元年薪的？九、有減肥法可以不做運動一個星期減十磅而唔傷身，任食，不會Rebound的？

幾年前我不停在專欄大聲疾呼，叫大家千祈咪信虛擬貨幣，因擺明騙局，一旦爆煲，必屍橫遍野。唉……終於近日成真，比特幣固然跌到喊阿媽，更大鑊為「穩定幣」TerraUSD及Luna幣，更宣布歸零。

以上其實全部用下Common Sense略作思考，都唔應該中招！

曾智華

阿碌開咪