阿碌開咪｜大董之戰好戲連場

《星島》獨家爆出馬會董事局改選「明爭暗鬥」，我就直接用「血戰」去形容嘞。

馬會選董事，從來都極「中式」，幕後傾掂晒數，大家同意才「投票」，絕冇意外或爆冷。任何人儍下儍下監粗「參選」，第一關是被勸退，第二關是冇人騷，唔夠票落選。因為馬會遴選委員乃一個銅牆鐵壁的小圈子，「細菌」都殺唔到入去，何況你想入董事局？

不過，今次戰役有多少唔同，因為闖關者為「發仔」劉業強，背景絕不簡單，包括：一、行政會議成員；二、新界鄉議局主席；三、立法會議員；四、全國政協委員。

劉業強對馬的知識，分分鐘高過晒現今班董事。一九九五年開始養馬，擁有大約二十隻良駒，而佢自己在外地亦有牧場。

你咪睇佢細細粒，成日笑笑口，兼且只有五十六歲，實質佢當年能夠擺平新界四方老叔父勢力，出任鄉議局主席，已知政治手腕及人脈布局唔簡單。

今番佢唔接受「勸告」，硬闖董事大位，當然覺得有一定把握，故殺入傳統既定勢力的「鐵圈子」。正因來勢洶洶，搞到「下屆主席」（大熱一賠一）利子厚急急向所有遴選委員發信，罕有明刀明槍點名想邊個當選。呢封信咁出，顯示情況「相當危急」，殺到埋身，必須最後亮劍，堅拒「發仔」闖關。

事到如今，當然血戰必須展開了。小弟與幾位有分量的馬圈中人交換意見，睇法如下：

一、今次有機會打破馬會的「預知名單規矩」，由現在到九月八日，甚麼事也可能發生！會否好似政圈選舉般不斷引爆「出人意表」材料？唔出奇，因已埋身肉搏！

二、今次有可能四個新人入晒，咁若要一位舊董事墮馬，韋安祖機會較高。因廖長江已欽定為隔代主席。陳智思後台勁如泰山。剩下的楊紹信及韋安祖皆會計師，來自傳統大集團，若要一個落馬，以今時今日政治形勢，當然老韋行先。

事實，若「發仔」入局，也有可能為香港賽馬事業擦出新火花也。

曾智華

阿碌開咪