阿碌開咪｜馬會大董爭位「血戰」

今日標題係咪好搶眼呢？你一定會問，有冇誇張啲啊，老友？

對，咁出標題乃希望人人睇。至於用到「血戰」是否誇張，局內人個個心里有數！

上周五本報頭條《馬會大董改選激烈，罕見「八爭七」局面》。

當朝《星島日報》一出，立即震動香港權力江湖。眾所周知，馬會乃香港「重要權力架構」，上流社會工商專業名人多屬會員，尤其能躋身成為遴選委員，更屬認定的地位象徵。若能再上一層樓成董事局成員（大董），地位肯定更巴閉過行政會議成員。至於做到主席……

一直以來，馬會高層都是「You scratch my back and I'll scratch yours」式的和諧「選舉」，相當「中式」，即未選已知邊個「凍蒜」（當選）。

馬會主席大位，慣性一做四年，通常七十歲交棒。大班時代，滙豐銀行主席更自然做埋馬會主席，例如桑達士（一九六七年至一九七二年）、沈弼（一九八一年至一九八六年）、蒲偉士（一九九二年至一九九三年）。回歸前後，華人上位，李福深、夏佳理（本土香港人）、陳祖澤及葉錫安都係每人做四年，恍似一個慣例。

如此一來，不少董事對主席位得個睇字，因等到七十歲要Out都未到也。

今屆陳南祿做主席，若冧莊，就有「恨到流口水者」冇機會做主席，於是發功逼逼逼，要求主席打破四年慣例，只做兩年，令更多人有得玩。

作風以圓融見稱，評估形勢後，好，退！於是先由利子厚接任，然後廖長江（六十五歲）就可一嘗主席心願，老婆大樂，光宗耀祖。大家明嗎？

至於董事位，罕見出現激烈競爭，四位新丁爭三個位。基於馬會傾向有兩位女董事，故此，馮婉眉、龔楊恩慈着數晒。剩下一個位，胡家驃乃大家族大馬主胡寶星後代，與李國能、周永健等前主席有親屬關係。

馬講血統，做董事也如是。睇嚟，劉業強將要墮馬嘞！

曾智華

 

阿碌開咪