阿碌开咪｜大董之战好戏连场

《星岛》独家爆出马会董事局改选「明争暗斗」，我就直接用「血战」去形容嘞。

马会选董事，从来都极「中式」，幕后倾掂晒数，大家同意才「投票」，绝冇意外或爆冷。任何人儍下儍下监粗「参选」，第一关是被劝退，第二关是冇人骚，唔够票落选。因为马会遴选委员乃一个铜墙铁壁的小圈子，「细菌」都杀唔到入去，何况你想入董事局？

不过，今次战役有多少唔同，因为闯关者为「发仔」刘业强，背景绝不简单，包括：一、行政会议成员；二、新界乡议局主席；三、立法会议员；四、全国政协委员。

刘业强对马的知识，分分钟高过晒现今班董事。一九九五年开始养马，拥有大约二十只良驹，而佢自己在外地亦有牧场。

你咪睇佢细细粒，成日笑笑口，兼且只有五十六岁，实质佢当年能够摆平新界四方老叔父势力，出任乡议局主席，已知政治手腕及人脉布局唔简单。

今番佢唔接受「劝告」，硬闯董事大位，当然觉得有一定把握，故杀入传统既定势力的「铁圈子」。正因来势汹汹，搞到「下届主席」（大热一赔一）利子厚急急向所有遴选委员发信，罕有明刀明枪点名想边个当选。呢封信咁出，显示情况「相当危急」，杀到埋身，必须最后亮剑，坚拒「发仔」闯关。

事到如今，当然血战必须展开了。小弟与几位有分量的马圈中人交换意见，睇法如下：

一、今次有机会打破马会的「预知名单规矩」，由现在到九月八日，甚么事也可能发生！会否好似政圈选举般不断引爆「出人意表」材料？唔出奇，因已埋身肉搏！

二、今次有可能四个新人入晒，咁若要一位旧董事堕马，韦安祖机会较高。因廖长江已钦定为隔代主席。陈智思后台劲如泰山。剩下的杨绍信及韦安祖皆会计师，来自传统大集团，若要一个落马，以今时今日政治形势，当然老韦行先。

事实，若「发仔」入局，也有可能为香港赛马事业擦出新火花也。

曾智华

阿碌开咪