阿碌開咪｜「懶議員」應受罰

人貴自重，有啲野唔使督促，都應自動自覺去做。大人大姐，要罰才做就瘀爆啦。

我講緊乜？講緊手握公權又交唔足貨的立法會議員！

未講議員，先講學生。中小學時，慣性上堂前要點名，故不能無故缺課。

很奇，中六開始，突然解放，大部分老師皆認為上唔上堂、學唔學習，到十八歲，已經應該有自由自決。事實，唔上堂乃閣下損失，責任自負，已經成年，毋須再逼。這種作風，由中六至大專，大部分學校如此，無人再用強制性手段逼你上堂。

我同唔同意？同意！反正你咁勁唔上堂，自修都功課及考試攞A，即「天才神童」啦。

不過，小弟又發覺，大部分老師/教授都對成世經常走堂的學生「另眼相看」，總之，你唔好衰畀我睇啦，唔上我堂等於唔尊重我，倒轉亦然噃！　

學生如此，議員又如何？雖則如今已「完善」咗議會選舉制度，「理論上」議員仍是選出來，要向市民交代的。

議員月月收公帑、享公權，豈可沒有責任與義務？係乜？正是為市民服務，監察政府，開會睇文件，議政論政。

意即開會（返工呀！）乃其中一個重要責任。佢哋並非學生，學生唔上堂考試肥佬後果自負。但佢哋唔開會吞噗，雖有負市民所託，但收咗公帑唔做或做唔足野，似乎吹佢哋唔脹。

咁啦，議員有責任監察政府，傳媒則有責任監察議員，全部衡功量值，若有失職偷懶者，一於公開省之哉，唔使客氣！鬼叫你話代表我哋又唔交功課咩？

立法會會議，堂堂點名，故好清楚邊個走堂。新一屆立法會運作近八個月，九十名議員，減四個跳槽做高官，仍有八十六人，個個理應次次立法大會、內務委員會及財務委員會開齊。不過，點名後發現兩名新丁林素蔚及蘇長榮最蛇，「走堂」最多。新丁已如此，變了「老是佛」還得了？

唔開會總會藉口多多，市民根本毋須要聽。除非病，否則一律兜口兜面噴：「唔想做請辭職！」

曾智華

阿碌開咪