青談|炒燶咗?

2022-06-22 10:45

如果話男團鏡仔係疫情受惠者,相信冇人會反對,奇就奇在身邊仔大女大步入中年事業有成的專業人士,都忽然出現了中毒沉迷症狀,為了撲飛,不惜以每張八千蚊價錢向「黃牛黨」購入了兩張演唱會門票。其實明眼人都知,所謂黃牛飛都係通過內部認購得來之物,當場館只能容納百分之七十五觀眾,內部認購比例又高達七成,真正可供公開發售之數少之又少,加上自問不懂使用高端電腦技術提升搶票機會率,遲來的實名制根本於事無補。

吓!唔係呀化!要向保險公司登記個人資料方可抽獎?要在指定時間升級指定月費計畫才有門票?想睇場演唱會支持偶像啫,點解要搞到咁複雜、要泄露咁多個人私隱?

這位朋友其實假假哋都係一位法律界嘅靚太,當然明白泄露個人資料嘅風險,思前想後,都係決定益啲來歷不明嘅黃牛黨。最令靚太氣憤者,係連銀行都同佢講只要擺八球(八百萬元)入戶口,其中兩球幫襯買投資產品,即可獲贈兩張鏡仔演唱會門票,靚太也不是蠢人,諗過度過環球進入加息周期,金股匯債商品無一倖免,貿貿然為兩張門票買投資產品隨時渣都冇,成本比黃牛更貴,第一時間Say No,豈料唔夠兩個星期,銀行打返電話嚟,話佢係特別尊貴客戶,可以正價買兩張門票,結果靚太可以睇兩場兼成功攤薄平均成本。

贊助商的捆綁式營銷,令本來已一票難求的演唱會門票更渴市,想睇偶像演出的粉絲,並非位位都想或有財力支持贊助商產品。根據自身經驗,靚太認為,如粉絲有多一點耐性,可博一博等到演唱會正式開場前最後一刻,會否有更貼近正價的門票回流市面。

既然鏡仔形象充滿韓團影子,何不考慮效法防彈少年團(BTS)演唱會門票分三輪發售的方式,即首階段先通過BTS的應用程式Weverse互動平台加入官方歌迷會,然後參加抽籤,中籤粉絲即可到指定購票網站購票,以歌迷會登記實名購票,才不會得失忠實粉絲。日本更會按歌迷入會年資分配座位,愈資深歌迷獲分配愈靚座位,誰才是最忠誠支柱,誰視你們為搖錢樹,你們懂的。

胡孟青

青談

關鍵字

最新回應

關鍵字
You are currently at: std.stheadline.com
Skip This Ads
close ad
close ad