阿碌開咪｜豬頭「代坐人」

監獄之中，坐滿各式人等，當中一種叫做「代坐人」。乜監都有得「代坐」㗎咩？有！因嚴格嚟講，應該「坐」的，並非佢，但可能佢儍下儍下畀人點，又或甘心情願為錢代人坐監。

香港哋，有好多犯罪行為都有代理人，即有人代你去犯罪。

簡單舉例，若你放數，債仔唔還錢，本來應自己去追的。追，當然不能斯斯文文，通常涉及某啲「令人驚嚇」行為，包括各式滋擾。若唔掂，就會進一步，例如貼街招、噴漆寫大字報。然後，再進一步，最流行是淋紅油、塞匙窿、灌水、放老鼠。呢類行為雖屬犯法，但對執法者來說，有一定「厭惡性」。因欠債還錢，天公地道。你唔還錢，畀人淋紅油，搞到阿Sir要做野，真係嬲你唔知，話你唔好意思。

知情人士話我知，原來代淋紅油都有公價，五百元至一千元，專搵未成年人做，因唔涉及傷人，一般法庭都輕判。

講到乜都有「代理人」，早年最「流行」的，是搵道友在商場賣四仔，以及在色情架步認頭做負責人。一旦查牌被掃，立即挺身而出交人。有贓有證有人認罪，執法者慳返好多時間，收隊去也。

最令正義阿Sir唔忿的，為少年毒販。明明儍下儍下未經大腦替人運毒，甚至販賣，法庭規定，必須重判，郁郁十年以上。如此，班懵仔懵女大好前程就咁冇咗，青春歲月就在籠牢度過。弊在呢類低智年輕人多屬貪威識食、冇分析冇能力之輩，畀人呃下????下用錢引下就上釣。

故此，若拉到幕後大毒販，必須以最重手去釘，以傳遞雷霆訊息。

最近又有多個「代坐人」被收監，邊種？老友大狀W話：「疫情關係，正常酒吧關門，但樓上私竇就遍地開花。基於好鬼好搵，真係開到嘭嘭聲。全部幕後有大老細投資，但個個唔會出面，遇上差人查牌掃場，一定會有『代理人』攬上身。呢類案，按例要判坐監！結果又製造出大群專業監躉！有錢乜都有人做，唔到你唔信！」

曾智華

阿碌開咪