阿碌开咪｜猪头「代坐人」

监狱之中，坐满各式人等，当中一种叫做「代坐人」。乜监都有得「代坐」㗎咩？有！因严格嚟讲，应该「坐」的，并非佢，但可能佢儍下儍下畀人点，又或甘心情愿为钱代人坐监。

香港哋，有好多犯罪行为都有代理人，即有人代你去犯罪。

简单举例，若你放数，债仔唔还钱，本来应自己去追的。追，当然不能斯斯文文，通常涉及某啲「令人惊吓」行为，包括各式滋扰。若唔掂，就会进一步，例如贴街招、喷漆写大字报。然后，再进一步，最流行是淋红油、塞匙窿、灌水、放老鼠。呢类行为虽属犯法，但对执法者来说，有一定「厌恶性」。因欠债还钱，天公地道。你唔还钱，畀人淋红油，搞到阿Sir要做野，真系嬲你唔知，话你唔好意思。

知情人士话我知，原来代淋红油都有公价，五百元至一千元，专搵未成年人做，因唔涉及伤人，一般法庭都轻判。

讲到乜都有「代理人」，早年最「流行」的，是搵道友在商场卖四仔，以及在色情架步认头做负责人。一旦查牌被扫，立即挺身而出交人。有赃有证有人认罪，执法者悭返好多时间，收队去也。

最令正义阿Sir唔忿的，为少年毒贩。明明儍下儍下未经大脑替人运毒，甚至贩卖，法庭规定，必须重判，郁郁十年以上。如此，班懵仔懵女大好前程就咁冇咗，青春岁月就在笼牢度过。弊在呢类低智年轻人多属贪威识食、冇分析冇能力之辈，畀人呃下????下用钱引下就上钓。

故此，若拉到幕后大毒贩，必须以最重手去钉，以传递雷霆讯息。

最近又有多个「代坐人」被收监，边种？老友大状W话：「疫情关系，正常酒吧关门，但楼上私窦就遍地开花。基于好鬼好搵，真系开到嘭嘭声。全部幕后有大老细投资，但个个唔会出面，遇上差人查牌扫场，一定会有『代理人』揽上身。呢类案，按例要判坐监！结果又制造出大群专业监趸！有钱乜都有人做，唔到你唔信！」

曾智华

阿碌开咪