阿碌開咪｜開波

開乜波？「大丈夫不可一日無權」！林鄭公開不再爭取連任（事實，佢想爭也冇得爭，因決定在中央手），要開始步入前港督肥彭介紹香港人的一個形容詞——跛腳鴨政府（Lame Duck Government），意即現屆政府由特首至所有司局長，皆可能要全部出局。　

正常人性，人走茶涼。就算你未走，但若肯定要走，一眾「正常」趨炎附勢者，由公務員下屬到政界、商界等等等等，仲點會「睇你台戲」？

略有修養的，仍會客客氣氣好來好去。但是，「現實幫」或昔日同你有牙齒痕者，仲唔乘機起義？輕則以冷面孔對待，重則利用「言論自由」批到你一文不值，踩你冇功又冇勞。

這就是血淋淋的政治現實。唔受得，千祈唔好踏入權力圈，因此乃「猛獸森林」，冇人會玩溫馨政治的，一切就只跟森林法則。

林鄭一聲不尋求連任，傳媒首先「重溫」佢任內一切。我睇完電視新聞睇報章，再上網，發覺一面倒「介紹」佢任內的社會不安、疫情氾濫、移民暴增、民怨沸騰……絕冇面畀。

坊間其他政治人物，好彩全部民主派已被「完善」，否則，肯定將佢批到體無完膚。

至於一眾建制大佬，也挺身指林鄭的「重大過失」，當中全國港澳研究會副會長劉兆佳批評最為嚴重：「林鄭執政五年，中央兩度被逼介入香港的管治！」

大家可聽到弦外之音？簡單就是——在你管治之下，「港人治港」全面失敗。不止，更要拖埋中央落水，幫你收拾爛攤子，在全世界人面前……

若你係中央，當然想香港一九九七年交接後，在所有國際「牛咁眼」政客面前，顯示回歸一片繁榮、「港人治港」全面成功、國際金融中心地位進一步提升、香港市民安詳和諧快樂地生活……

以上一切，過去五年冇晒。你係中央，都會谷到上心口啦。無法，老大不願都要替你搞掂本來「主體責任」在你的爛局。

肯定，林鄭未來兩個月有排受！

曾智華

阿碌開咪