阿碌開咪｜抗食疲勞

特首在日日（有冇需要呀？）的記者會中，不時提及市民「抗疫疲勞」（唔使講，人人感受到嘞！），希望盡快疫情過去，大家回復正常生活，經濟復甦，人人有工開！

其實抗乜抗物疲勞之中，小弟班為食鬼老友，人人呢三個月都「抗食疫勞」。晚晚冇得出街大吃大喝亂噏，屈在家中，積積埋埋好多負面情緒，隨時「一觸即發」。這個，上周香港大學的「防止自殺早期預警系統」已有分析，不贅。

若問「抗食疲勞」有冇咁嚴重呀？難講！人乃群體動物，喜歡正常社交。而最佳Medium，乃聚埋吃一頓豐富的、美味的晚飯，讓身心盡情享受，自然免疫力提高，人人身體健康。

反之，鬱埋鬱埋，冇病都變有病！

早前我在此的一篇《準備報復性狂食》，公布疫情穩定後如何組織各「為食組」，到相熟食肆逐一開餐。嘩嘩，反應之熱烈，完全超出估計之外。個個摩拳擦掌，誓要搶先報名，話「執輸行頭慘過敗家」，真誇張！

既然咁大熱誠，小弟一於繼續努力。早兩日去訊各目標食肆，詢問復業日子。全部火速回應。好，就在此公布：

一、鰂魚涌「富嘉閣」，經已復業；二、中環「陸羽茶室」，四月八日；三、天文臺道8號「星薈」，四月十五日；四、佐敦偉晴街「順德公漁村」，四月八日，華員會店暫定四月二十一日；五、南華會保齡球場「甘棠燒鵝」，四月二十一日開晚市；六、擺花街「碧儷苑」，四月十七日；七、尖沙嘴「瑪寶鮮酒家」，四月二十一日；八、灣仔「順聯薈」，天天營業；九、灣仔「喜萬年酒樓」，四月二十一日；十、「百樂集團」，圓方、美麗華商場及東涌店四月五日，西九大舞台店，四月九日；十一、灣仔「杭州酒家」，已日日營業。

以上十一家，我已部署好，紮定個馬，晚市開閘即帶隊殺去。嘩，真係諗吓都開心。大家有美食歎，也可製造就業機會，你話幾正！

曾智華

阿碌開咪