樂●活｜世界關顧自閉日 4.2一「童」包容

今日（4月1日）係愚人節相信無咩人唔知，但大家又知唔知4月2日原來係聯合國所定嘅世界關顧自閉日。

協康會喺每年４月的第一個星期都會舉辦「協康會自閉症關注周」以作響應，而今年就以「一『童』包容，『你』解佢心」為主題，希望大家能接納自閉症人士，理解佢哋特別行為背後嘅原因，而大家只需報以簡單嘅點頭或微笑，已經係最好嘅回應。

自閉症係先天腦部功能受損傷而引起嘅發展障礙，根據美國疾病控制及預防中心（CDC）喺2021年12月公布嘅最新數據發現，每44名兒童中就有1名係自閉症，較之前數據顯示每54名兒童有1名患有自閉症有進一步上升。協康會今年更聯乘城中癲噹@貓室（din-dong）、賤人新世紀、傭仔日記、Dustykid、文地貓、Kazy Chan6位人氣插畫師，以漫畫帶出理解及包容自閉症人士嘅信息，同時又邀得包括凌文龍、岑珈其、鄧麗欣、余香凝、陳嘉寶、陳凱琳、歐陽偉豪（Ben Sir）等支持，呼籲公眾提升對自閉症人士關注，並到網站簽署承諾了解和接納自閉症人士。

協康會為咗令更多人認識自閉症，去年就設計出「A+家族」原創角色：嘈總、堅哥、蘭子、然成郁、阿窄、廣吳明，分別代表估佢哋難以用言語表達情緒、行為固執、有社交困難，喜歡重複行為、擁有狹窄興趣，以及不懂得理解別人的特質。今年A+家族角色不單以3D造型亮相，更走入社區，重演大家在街上遇見自閉症朋友情景；又會喺6大交通工具現身，與6位人氣插畫師齊齊互動；而插畫師Kazy Chan更特別為A+家族製作6個陶瓷公仔，由協康會製作成定格動畫短片，以簡單故事帶出自閉症人士嘅特色，並於社交媒體推出。

大家除咗可以喺協康會自閉症關注周網站即時簽署承諾了解和接納自閉症兒童，了解更多關於自閉症的資訊。仲可以入手期間限定慈善產品，包括協康會×Maskology×癲噹「包」「容」口罩及香港電車造型限量版「童」「理」消毒A+家族酒精搓手液，以支持協康會的自閉症支援服務，讓更多自閉症兒童、青年以及其家人都可以獲得適切嘅服務，產品可以喺協康會網上商店買到。

 

作者：Laurie Wu（愛保健愛旅遊愛購物的熟女）
[email protected]