阿碌開咪｜美食車死因研究

時光倒流幾年前，老友「樂觀P」有日拉我講：「碌Sir，發達！終於投到個美食車牌，可以呢度去、嗰度去，賣我的拿手自家研發美食喇！」

我一聽，哎吔吔，慘！立即潑佢冷水：「P仔，千祈千祈唔好做啊，瓜硬㗎！美食車在香港，必定變日本大郵船——遲早完！你信我啦。冇咗幾十萬元投資外，更會打殘你對做生意嘅信心及雄心壯志㗎 ……」

當日P仔已經上晒火，當然唔會聽小弟忠告，反之，摩拳擦掌去馬。結果好嘅唔靈……其實唔使先知或有乜乜水晶球，稍認識官場政治者，必知道——美食車陰乾可期！

點解？未講點解，先講講為乜全球大商家咁怕政府高官？無論任何巴閉巨富，都要千方百計與官員打交道。無他，富豪雖有錢，但做官則有權，加上政府規章保護，想玩你，容乜易？

簡簡單單如一張消防裝置圖或者建築圖，快批與慢批，隨時拖到你唔見天文數字金錢！

再大啲，訂政策的，若少少傾斜，產生的財富效果已經不得了。所以，千祈咪得罪官！此乃商場的金科玉律。

不可得罪，咁點玩？倒轉搞關係囉。

點搞？各師各法，今日唔爆得咁多嘞。最低手就係赤裸裸送個鮑魚果籃上門，仲要畀人設局影埋踢爆。真是下下之手！高手？你話呢？

講返美食車，我強烈勸喻P仔咪搞的原因，其實一字咁淺，美食車乃曾俊華的Baby是也。曾俊華在上屆特首之戰，與林鄭月娥打生打死，辯論直播中，佢窒到林太一戙都冇，只好尷尷尬尬地苦笑。但小弟一睇，已知若林鄭一旦登頂，曾俊華及所有佢的「馬房」及Baby，全部肯定冇運行，逐一被陰乾式處理。

此乃最簡單的官場政治。當林太坐上特首位後，佢完全唔使畀指示點處理美食車，總之所有下屬都會自動識做，尤其負責的商務及經濟發展局。

在政策上，必會積極「招呼」，直至……直至乜？直至美食車失血過多，自動收檔去。

曾智華

阿碌開咪