阿碌开咪｜美食车死因研究

时光倒流几年前，老友「乐观P」有日拉我讲：「碌Sir，发达！终于投到个美食车牌，可以呢度去、嗰度去，卖我的拿手自家研发美食喇！」

我一听，哎吔吔，惨！立即泼佢冷水：「P仔，千祈千祈唔好做啊，瓜硬㗎！美食车在香港，必定变日本大邮船——迟早完！你信我啦。冇咗几十万元投资外，更会打残你对做生意嘅信心及雄心壮志㗎 ……」

当日P仔已经上晒火，当然唔会听小弟忠告，反之，摩拳擦掌去马。结果好嘅唔灵……其实唔使先知或有乜乜水晶球，稍认识官场政治者，必知道——美食车阴乾可期！

点解？未讲点解，先讲讲为乜全球大商家咁怕政府高官？无论任何巴闭巨富，都要千方百计与官员打交道。无他，富豪虽有钱，但做官则有权，加上政府规章保护，想玩你，容乜易？

简简单单如一张消防装置图或者建筑图，快批与慢批，随时拖到你唔见天文数字金钱！

再大啲，订政策的，若少少倾斜，产生的财富效果已经不得了。所以，千祈咪得罪官！此乃商场的金科玉律。

不可得罪，咁点玩？倒转搞关系罗。

点搞？各师各法，今日唔爆得咁多嘞。最低手就系赤裸裸送个鲍鱼果篮上门，仲要畀人设局影埋踢爆。真是下下之手！高手？你话呢？

讲返美食车，我强烈劝喻P仔咪搞的原因，其实一字咁浅，美食车乃曾俊华的Baby是也。曾俊华在上届特首之战，与林郑月娥打生打死，辩论直播中，佢窒到林太一戙都冇，只好尴尴尬尬地苦笑。但小弟一睇，已知若林郑一旦登顶，曾俊华及所有佢的「马房」及Baby，全部肯定冇运行，逐一被阴乾式处理。

此乃最简单的官场政治。当林太坐上特首位后，佢完全唔使畀指示点处理美食车，总之所有下属都会自动识做，尤其负责的商务及经济发展局。

在政策上，必会积极「招呼」，直至……直至乜？直至美食车失血过多，自动收档去。

曾智华

阿碌开咪