阿碌開咪｜選舉投票率牙骹大戰

老友聚頭晚飯，為免傷和氣，最佳是兩杯到肚，爆下無關痛癢秘聞（例如最近N加N咁多人問我，當日梅艷芳參加《新秀歌唱大賽》，究竟邊個獨一無二、有眼無珠評判，明明佢彈離贏，仍要打個大交叉想踢佢出局？），講下邊度有好食，八下娛樂界、商界、政界等有乜新料等等。

政治？多講傷和氣，也嘥氣，避之則吉。

不過，唔講政治內容啫，估下政治形勢可以啩。故此，近日各路英雄飯局，最多人互問係：「下屆特首會由邊個做？」然後七嘴八舌亂鬼咁猜。

小弟永不參與這個競猜遊戲，因為估乜都絕對多餘。你有權決定咩？冇喎！之但係，你又問唔到決定者，咁就無謂浪費口水啦。昨晚一大群政界、傳媒界、學術界及專業界老友開花錦鱔王加古法羊腩煲大餐，食到高潮，我一二三拋出個大家都有興趣的競猜遊戲：「各位各位，搵啲嘢估下，鋪定下餐邊個請好嗎？」

嘩，個個即時摩拳擦掌：「快快快畀題目！」

「就係……估估十二月十九日立法會投票，直選部分，投票率將會如何？」我大大聲講。

建議一出，七嘴八舌，笑死冇命賠。真係斷估冇痛苦，竟然由一成到七成都有人估，非常兩極化。

結果點呢？由我一錘定音！

「七成就肯定冇嘞，無謂天真，一成則又攞嚟講啫。咁啦，聽晒咁多位意見，我剛剛計出平均數，為兩成半！就以此劃界綫。買上嘅先舉手！」（結果，七隻手！）「好！買下嘅，就係其他，即五隻手！十二月十九日後即知，睇睇下餐七人請五人定五人請七人嘞。」

小弟觀察，估超過兩成半的七位，包括建制派議員、大集團行政人員、高官及娛樂節目名主持。至於認為兩成半以下投票率的，則清一色為資深傳媒人。唔……都幾有「界別分歧性」喎。

近日各位可有發覺，大量「期望管理」言論不停湧出？其實這已經有相當大的指標性！睇睇呢鋪開乜先？

曾智華

 

阿碌開咪