【阿碌開咪】生意接到手軟

對香港，小弟從來充滿樂觀，尤其經濟方面。這種感覺，絕非甚麼一廂情願，而是基於六十多年來的親身體驗及觀察。

　　尤其香港飲食業，不但是雞死雞鳴，更甚是新雞不少比舊雞更健康、更扎實，以及更有質素。

　　這方面我冇乜興趣與人爭辯，明就明啦。事實，過去兩年幾，大環境差到飛起。對呀，執笠的確實不少，但只要問問掌握大數據的業內人，自會發現，原來「開」的數目，竟然比「執」的更多，問你服未？

　　對於搞到要「執」的，我不想講甚麼，總之希望佢哋修煉好武功後，再東山復出，一定有機會闖出一片天！

　　簡單，香港為食鬼幾百萬，你只需出品平平均均，已經冇理由企唔住。若比別人好少少，更可能生意多到應接不暇。

　　經常外出晚飯一族，唔使我講嘞，必知高水準的食肆近日已晚晚爆瀉，一位難求。

　　三個月前小弟訂咗一家酒樓做活動，目標日子為十月尾。未決定時，負責人再三請求：「碌Sir，幫幫忙吖，日子好難捱呀，B區加疫情，唉……」

　　好，訂就訂！點知跟着兩個月，疫情明顯減退，香港長期本土清零，那家酒樓又申請到D區，現今更可坐到二百四十人！

　　昨天我枱頭電話又響了，正是酒樓負責人：「碌Sir……唔好意思……真係唔好意思……」

　　聽佢口窒窒，都知合該有事㗎嘞！

　　「Y哥，講啦，唔使擔心嘅，我明白嘅！」

　　N年前，小弟自己也搞過食肆，對於內里的困難及辛酸，當然略有掌握，亦會同情捱到死下死下的業內人士。

　　「碌Sir，因最近我哋申請到D區，加上政府放寬到二百四十人。突然出現大量婚宴、結婚周年紀念、滿月、集團周年慶典……訂親都百幾二百人起碼，而且單頭（消費）又大得多。所以……當我唔啱，欠你一個人情……你可否畀返個期我呢？」

　　到如此地步，唔通我話No咩？唯有講：「恭喜晒，好啦，一於成人之美，日後再合作！」

曾智華

阿碌開咪