【阿碌開咪】急需新聞統籌專員

　特首林鄭月娥上任時，唔知點解，好地地取消咗個新聞統籌專員位，結果幾年來出咗不少低層次公關問題。

　　昨晚與兩位前高官及一位公關系教授晚餐，講下講下，講到呢個話題。

　　高官A：「真係唔明白，Carrie點解有新聞統籌專員都唔用？開位咁鬼難，多個人幫手，執漏都好吖，錢又唔係自己出，真係……」

　　高官B：「咪係。以前港督肥彭空降香港，乜野官都冇帶嚟，只帶兩個大內侍衞，專捉老闆出席公共場合時可能出錯的地方，以確保彭定康永遠親民但又英明神武的形象。」

　　此時公關大教授放低杯紅酒，緩緩點出新聞統籌專員的重要性。「早年曾蔭權任命資深新聞人何安達做呢個位，因要一眼關七。首先，快速掌握所有媒介對特首的攻擊，又或準備攻擊，以作應對及預防。專員更要與香港及外地媒介有聯繫，方便安排正面訪問。有江湖地位的專員，更可選擇及指定訪問者由誰做，擔保信得過，唔會放蕉皮。」

　　大教授一邊講，兩位高官一邊頷首認同。

　　「新聞統籌其中一項武功不可缺，為在老闆接受訪問前，擬出可能出現的最辣問題及最壞情況，並安排預演！此外，每次特首出席記者會，專員必須事先到場，扮特首走一次位。睇睇企位、高低度，以及發言時的舒適度。此外，更要觀察燈光合適否？須知燈光也會影響一個人的形象。還有，咪位高低及音量強弱也重要。咪Set得好，企在前，可以氣定神閒發表言論，不用彎身或就位！」

　　係咪愈聽愈多學問呢？所以，值成二十萬元月薪㗎！

　　「其實真正的高手專員，連特首到不同場合的衣飾配襯，也需作出建議，絕對不可畀『主角』亂着一通，尤其出席外交場合，着錯衫，冇人會原諒的！」

　　未完，公關大教授進一步指出：「專員更須專執錯處。林鄭若有新聞統籌專員，早前記者會背後塊布景寫上『中國人民共和國』，點可能出到街？」

曾智華

阿碌開咪