【阿碌開咪】險過剃頭幾乎瓜得

正所謂塞翁失馬，焉知非福。真的是福兮禍兮只差一綫！

今日我講乜？講一家酒樓老闆的一個決定，執返條「命」。否則，必定已執笠，再孭成身債無疑。

酒樓正是有四十年歷史的灣仔喜萬年酒樓，一九七二年開業時，風光無限，在灣仔軒尼詩道一號熙信大廈頂樓，霸佔二十一、二十二全層，開其酒樓夜總會。紙醉金迷，董事長乃已故的「新世界之父」鄭裕彤。

彤叔交遊廣闊，極吃得開，故此，起碼頭十年儼然城中主要銷金窩，不少大闊佬訂有長枱。

十年後，一九八二年，彤叔轉手給大馬主呂少文，同樣在江湖極吃得開，生意無憂。

不過，夜總會運程也會隨地運而改變。上世紀八十年代開始，全港煙花之地，慢慢由灣仔移了過尖沙嘴東部。喜萬年作風保守，當然黃金時期不再。於是，在一九九四年結束夜總會，只主攻懷舊廣東菜，以即燒乳豬紅遍飲食界。另一味滷水肥生腸，也真食到耳仔郁。

小弟上一代已是喜萬年熟客，故與現今揸Fit人陳海祥董事，可謂識於微時。

熙信大廈二○一三年拆卸，頓時令不少「喜萬年迷」若有所失。幸而英皇集團中心地庫剛有靚位，雖然比較細，但熟客只求有碇落腳，懷舊一下，遂於同年八月重現江湖。

熙信大廈拆後，火速重建，鎖定二○一九年五月新廈落成，改名One Hennessey，有型前衛。

發展商在落成前，力邀喜萬年回巢再創天下，承諾租出最靚大樓面，定價百多萬元月租。

百多萬元是否很貴？聽就是，但若計得掂數，經營酒樓可以是「小金礦」。

不過，喜萬年老闆思考後，仍覺風險太大，且老夥計年紀不小，再重錘投資，由資本到經營魄力，都難有信心。於是，放棄再闖江山的「黃金機會」。這個放棄，終於救回喜萬年一命。點解？因若硬撐在二○一九年五月搬到新廈，請問至今會蝕去多少錢（動亂加疫情）？回想幾乎落水，也真險過剃頭！

曾智華

阿碌開咪